چیف جسٹس نے وکیل کو 2ہزار روپے جرمانہ کردیا

چیف جسٹس قاضی فائز عیسیٰ نے کیس کی سماعت کے دوران مکمل دستاویزات پیش نہ کرنے پر وکیل کو 2ہزار روپے جرمانہ کردیا ۔چیف جسٹس قاضی فائزعیسیٰ کی سربراہی میں 3 رکنی بینچ نےجرمانہ انکم ٹیکس کےکیس کی سماعت کی، دوران سماعت چیف جسٹس قاضی فائزعیسیٰ نے واضح کیا کہ ہم ذرا اولڈ فیشن ججز ہیں، مکمل دستاویزات دیکھیں گےْ۔ استفسار کیا کہ آپ کے ساتھ ریونیو کا کوئی افسر نہیں آیا؟ اس  پر وکیل درخواست گزار نے عدالت کو بتایا کہ ’ جی میرے ساتھ کوئی نہیں آیا‘۔

 وکیل درخواست گزار کے مؤقف پر چیف جسٹس نے واضح کیا کہ  ہم نے کہا ہے انکم ٹیکس کاکیس تب تک چل سکتا ہے جب تک متعلقہ ڈپارٹمنٹ کا بندہ ساتھ ہو، عدالت کو معاونت ملتی نہیں اورکہتے ہیں کروڑوں روپے مالیت کے کیس پرسپریم کورٹ کا اسٹے ہے۔

 چیف جسٹس کے استفسار  پر  وکیل درخواست گزار نے کہا ہم کوشش کریں گے کہ حکم کی تعمیل ہو اس  پر چیف جسٹس  کا کہنا تھا کہ آپ کوشش کریں اگر تعمیل نہ ہو پھر دیکھیں کیا ہوتا ہے، ایسی بات ہی نہ کیا کریں، اس کا مطلب کہ آپ کے پاس آپشن ہے کہ تعمیل نہ کریں۔

 دلائل سننے کے بعد چیف جسٹس نے استفسار کیا کہ آپ بتائیں کتنا جرمانہ کریں؟ آپ کی مرضی کے مطابق کردیتے ہیں اس پر وکیل درخواست گزار نے کہا کہ ایک ہزار جرمانہ کردیں۔چیف جسٹس نے کہا کہ آپ جیسے سینئر وکیل سے یہ امید نہیں تھی، چلیں 2 ہزار جرمانہ کردیتے ہیں، جرمانہ اپنی مرضی کے چیریٹی فنڈ میں جمع کرواکے رسید عدالت میں جمع کروائیں۔