غنڈوں کا منسوخ کردہ پاسپورٹ نواز شریف کو نہیں چاہیئے

پاکستان مسلم لیگ ن کی ترجمان مریم اورنگزیب نے کہا ہے کہ غنڈوں کا منسوخ کردہ پاسپورٹ نہیں چاہئے، نوازشریف جب چاہیں گے پاکستان آئیں گے۔
تفصیلات کے مطابق وفاقی دارالحکومت اسلام آباد میں پریس کانفرنس کرتے ہوئے انہوں نے کہا کہ سابق وزیر اعظم نواز شریف کو جعلی اور نااہل سیاسی دہشت گردوں سے پاسپورٹ کی تجدید کرانے کی ضرورت نہیں ہے ، وائٹ کالر بدمعاش حکومت چلا رہے ہیں، گلی محلے کے بدمعاشوں کی طرح لوگوں کو بلیک میل کرتے ہیں۔ وزیراعظم نے گلی کے غنڈے حکومت میں رکھے ہوئے ہیں، ٹاوٹس اور فرنٹ مینز کے ذریعے حکومت چلائی جا رہی ہے۔ ترجمان ن لیگ نے کہا کہ حکمرانوں کا طریقہ واردات یہ ہے کہ 14 ہزار ارب کا قرضہ کھاؤ اور کمیشن بنا دو، سینیٹ میں پیسے دیتے اور لیتے پکڑے جاؤ تو کمیشن بناؤ، ہر معاملے پر کمیشن بنائے گئے لیکن نتیجہ صفر آتا ہے، وزیراعظم نے وزیر نہیں کماؤ پوت رکھے ہوئے ہیں جہاں سے پیسوں کی آواز آتی ہے ان کی رالیں ٹپک جاتی ہیں، جہاں سے مال ملنے کی آواز آتی ہے وہاں بندے تعینات کر دیئے جاتے ہیں، کمیشن خوروں کو کمیشن نہیں ملا تو لڑائی میں نئی باتیں سامنے آئیں۔ مریم اورنگزیب نے کہا کہ ڈیوڈ روز نے شہزاد اکبر کی میٹنگ موسوی سے کرائی، شہزاد اکبر بتائیں گے کس حیثیت میں موسوی اور ڈیوڈ روز کو استعمال کرتے رہے؟ شہزاد اکبر کے کہنے پر یہ میٹنگ کرائی گئی، کیوں کہ سلیکٹڈ وزیر اعظم کے مشیر کمیشن کے مشیر ہیں، نیب کے چیئرمین کہاں چھپے ہوئے ہیں، عمران خان کے تابع شہزاد اکبر اور ان کے تابع چیئرمین نیب ہیں، ان کے اصل چہرے عوام کے سامنے آنے چاہیں، شہزاد اکبر نے مجھ پر ہتک عزت کا دعوی کیا، عمران خان، شہزاد اکبر، موسوی اور ڈیوڈ روز کے رابطوں کا ڈیٹا پبلک کیا جائے۔