گال ٹیسٹ،قومی ٹیم سری لنکا کے 222 رنز کے تعاقب میں
پاکستان کرکٹ ٹیم نے سری لنکا کیخلاف پہلے ٹیسٹ میچ میں میزبان ٹیم کے 222 رنز کے تعاقب میں پہلے دن کے کھیل کے اختتام پر 24 رنز بنا لئے۔
قومی کرکٹ ٹیم نے گال ٹیسٹ میں سری لنکا کی پوری ٹیم کو 222 رنز پر آؤٹ کرنے کے بعد اپنی پہلی اننگز کا آغاز کیا تو امام الحق صرف 2 رنز بنا کر آؤٹ ہوگئے۔ تجربہ کار بلے باز اظہر علی اور عبداللہ شفیق بھی بڑی شراکت داری میں ناکام رہے اور 21 کے مجموعے پر دوسری وکٹ گر گئی، عبداللہ شفیق 13 رنز بنا کر جے سوریا کی گیند پر آؤٹ ہوگئے، گال ٹیسٹ کے پہلے روز کھیل کے اختتام پر پاکستان نے دو وکٹوں پر 24 رنز بنا لیے تھے۔
دریں اثنا سری لنکا کرکٹ ٹیم نے ٹیسٹ سیریز کے پہلےہی ٹیسٹ میچ میں سری لنکا نے ٹاس جیت کر پہلے بلے بازوں کو آزمانے کا فیصلہ کیا،جس کے عوض وہ 222 رنز ہی بناسکے۔میچ کے تیسرے ہی اوور میں سری لنکا کو پہلا نقصان اٹھانا پڑا اور شاہین شاہ آفریدی نے کپتان دمتھ کرنارتنے کی وکٹیں بکھیر دیں، اس کے بعد اوشادا فرنینڈو کا ساتھ دینے کوشل مینڈس آئے اور دونوں نے دوسری وکٹ کے لیے 49 رنز کی شراکت قائم کی لیکن اس سے قبل کہ یہ شراکت خطرناک شکل اختیار کرتی، ایک عرصے کے بعد ٹیم میں واپس آنے والے یاسر شاہ نے کوشل مینڈس کو چلتا کردیا،ابھی سری لنکن ٹیم اس نقصان سے سنبھلی بھی نہ تھی کہ اگلے ہی اوور میں حسن علی نے اوشادا فرنینڈو کی اننگز کا خاتمہ کردیا، سابق کپتان اینجلو میتھیوز وکٹ پر آنے کے بعد مستقل جدوجہد کرتے نظر آئے اور بالآخر 15ویں گیند پر کھاتا کھولے بغیر ہی یاسر کی دوسری وکٹ بن گئے۔
میڈیارپورٹس کے مطابق سابق کپتان اینجلو میتھیوز وکٹ پر آنے کے بعد مستقل جدوجہد کرتے نظر آئے اور بالآخر 15ویں گیند پر کھاتا کھولے بغیر ہی یاسر کی دوسری وکٹ بن گئے، کھانے کے بد دھننجیا ڈی سلوا اور دنیش چندیمل نے مل کر اسکور کو 99 تک پہنچا دیا لیکن سنچری مکمل ہونے سے قبل شاہین شاہ آفریدی نےدھنجیا کی14 رنز کی اننگز کے آگے فل اسٹاپ لگا دیا، نروشن ڈکویلا نے شاہین کو وکٹ پر آتے ہی چوکا لگایا لیکن نوجوان پاکستانی فاسٹ باؤلر نے اگلے اوور میں آغا سلمان کی مدد سے ان کا کام تمام کردیا۔
103رنز پر چھ وکٹیں گرنے کے بعد لگتا تھا کہ شاید سری لنکن ٹیم جلد پویلین لوٹ جائے گی لیکن گزشتہ میچ میں آسٹریلیا کے خلاف ڈبل سنچری بنانے والے تجربہ کار دنیش چندیمل پاکستان کی راہ میں حائل ہو گئے اور ٹیل اینڈرز کی مدد سے قیمتی رنز جڑے، انہوں نے پہلے رمیش مینڈس کے ساتھ 27 رنز کی شراکت قائم کی لیکن جلد ہی رمیش کے ساتھ ساتھ پرباتھ جے سوریا بھی چلتے بنے، نویں وکٹ کے لیے چندیمل کا ساتھ دینے میہیش تھکشانا آئے اور دونوں نے 44 رنز جوڑے، چندیمل نے 76 رنز کی عمدہ اننگز کھیلی،جبکہ سری لنکا کی دسویں وکٹ کا حصول بھی پاکستان کے لیے محال بن گی اور آخری جوڑی نے بھی 45 رنز کی ساجھے داری قائم کر کے اپنی ٹیم کو معقول مجمعے تک رسائی دلائی، سری لنکا کی پوری ٹیم 222رنز بنا کر آؤٹ ہو گئی، مہیش تھکشانا نے 38رنز بنائے۔
پاکستان کی جانب سے شاہین شاہ آفریدی نے چار جبکہ حسن علی اور یاسر شاہ نے دو، دو وکٹیں حاصل کیں، اس سے قبل پاکستان نے میچ کے لیے ایک دن قبل ہی فائنل الیون کا اعلان کردیا تھا اور حیران کن طور پر فواد عالم کو ٹیم سے ڈراپ کردیا گیا جبکہ آغا سلمان کو ٹیسٹ ڈیبیو کرایا گیا ہے،میچ کے لیے پاکستانی ٹیم ان کھلاڑیوں میںبابر اعظم(کپتان)، عبداللہ شفیق، امام الحق، اظہر علی، محمد رضوان، آغا سلمان، محمد نواز، یاسر شاہ، حسن علی، شاہین شاہ آفریدی اور نسیم شاہ شامل ہیں۔
