شہر قائد میں ہونیوالے حالیہ دھماکوں میں "را” ملوث ہے
شہر قائد میں ہونیوالے حالیہ بم دھماکوں میں بھارتی خفیہ ایجنسی "را” ملوث ہے۔
قانون نافذ کرنے والے ادارے کی حالیہ دھماکوں سے متعلق تجزیاتی رپورٹ میں اہم انکشافات سامنے آئے ہیں۔
رپورٹ میں بتایاگیا ہے کہ کراچی میں ہونے والے خودکش دھماکے سمیت تینوں بم دھماکوں میں بھارتی خفیہ ایجنسی ’را‘ ملوث ہے۔
رپورٹ میں کہا گیا ہے کہ کراچی کے علاقے صدر اور کھارادر کی بولٹن مارکیٹ دھماکوں میں تین دہشتگرد گروہوں نے ایک دوسرے کی معاونت کی، متحدہ لندن کے سلیپر سیل سے مبینہ طور پر علاقے کی ریکی کا کام لیا گیا۔
رپورٹ کے مطابق ماضی میں اس طرح کے بم بنانے اور نصب کرکے دھماکے کرنے کا کام کالعدم بی ایل اے کا طریقہ رہا ہے جب کہ ایس آر اے بھی صوبے کے اندورنی علاقوں میں ایسا کام کرتی رہی ہے، حالیہ دھماکوں میں بم نصب کرنے اور دھماکے میں کالعدم ایس آر اے کی مدد لی گئی ہے جب کہ دھماکوں کا مقصد قانون نافذ کرنے والوں کے ساتھ تجارتی علاقوں کو نشانہ بنانا ہے۔
واضح رہے کہ گزشتہ روز کراچی کے علاقے کھارادر میں ایم اے جناح روڈ پر واقع میمن مسجد کے قریب دھماکے سے ایک خاتون جاں بحق اور 11 افراد زخمی ہوگئے تھے جبکہ کراچی میں گزشتہ ہفتے صدر کے علاقے میں دھماکے سے ایک شہری جاں بحق اور 8 افراد زخمی ہوگئے تھے جبکہ متعدد گاڑیاں بھی تباہ ہوگئی تھیں۔
