عمرکا بڑھنا پٹھوں کو کس طرح متاثر کرتا ہے؟

مطالعے میں پٹھوں کے خلیوں کے اندر موجود جینز کا جائزہ لیا گیااور زیادہ عمر والے خلیوں میں ’ڈیویلپمنٹ پاتھ ویز‘ (وہ مختلف طریقے جن کے تحت جینز پٹھوں کو دوبارہ بنانے کے لیے ایک ساتھ کام کرتے ہیں) کو کمزور پایا۔

ناٹنگھم یونیورسٹی سے تعلق رکھنے والی ڈاکٹر لِیویا سینٹوس، جن کی رہنمائی میں تحقیق کی گئی، کا کہنا تھا کہ یہ دریافت بتاتی ہے کہ جیسے جیسے ہم بوڑھے ہوتے ہیں ہمارے پٹھوں کی چوٹ دیر سے کیوں ٹھیک ہوتی ہے۔

انہوں نے کہا کہ ہم جانتے ہیں کہ صحت مند پٹھہ چوٹ لگنے کے بعد دوبارہ بن جاتا ہے لیکن عمر کا بڑھنا پٹھے کے دوبارہ بننے کے صلاحیت کو متاثر کر دیتا ہے اور جتنی زیادہ عمر بڑھتی ہے صحت یابی اتنی مشکل ہوجاتی ہے۔

انہوں نے بتایا کہ خلیوں کے افعال اور نشونما کو کنٹرول کرنے والی راہداریاں عمر رسیدہ خلیوں میں مختلف انداز میں کام کرتی ہیں جس کا مطلب ہے عمر بڑھنے کے ساتھ پٹھوں کا دوبارہ بننا متاثر ہوتا ہے۔ اگر ان راہداریوں کو سمجھ لیا جائے تو ہم اس مسئلے کو حل کرنے کے لیے نئے علاج متعارف کروا سکتے ہیں۔