نان فائلرز کے بیرون ملک سفر پر پابندی کی تجویز منظور

سینیٹر سلیم مانڈوی والا کی زیر صدارت سینیٹ کی قائمہ کمیٹی برائے خزانہ نے نان فائلرز کے بیرون ملک سفر پر پابندی کی تجویز کو منظور کرلیا۔

سینیٹر فاروق ایچ نائیک کا کہنا تھا کہ نان فائلرز کے بیرون سفر پر پابندی کا مطلب ایگزٹ کنٹرول لسٹ میں نام آنا ہی سمجھا جائے گا، نان فائلرز پر ود ہولڈنگ ٹیکس کی شرح بھی زیادہ ہے، ان کی موبائل سمز اور کاروبار بھی بند کیا جاسکتا ہے۔

فلاحی اسپتالوں پر سیلز ٹیکس چھوٹ ختم کرنے کا فیصلہ

چیئرمین ایف بی آر نے قائمہ کمیٹی کو بتایا کہ 5 لاکھ نان فائلرز کی فہرست میں سالانہ 20 لاکھ سے زائد آمدن والے لوگ ہیں، ماضی میں یہ لوگ ٹیکس ریٹرن میں اپنی آمدن ظاہر کرچکے ہیں۔ صرف گاڑی، پلاٹ یا گھر خریدنے کےلیے وقتی فائلر بننے والوں کو بھی اضافی ٹیکس ادا کرنا ہوگا۔ چیئرمین ایف بی آر نے بتایا کہ ٹیکس ریٹرن فائل نہ کرنے والوں کے خلاف انکم ٹیکس جنرل آرڈر کے تحت کارروائی ہوگی، حج، عمرہ، چھوٹے بچوں، طلبہ اور نائیکوپ رکھنے والے اوورسیز پاکستانیوں کو استثنیٰ حاصل ہوگا۔ نان فائلرز کی موبائل سمز، بجلی اور گیس کنکشن بھی منقطع کیے جائیں گے۔