پی ٹی آئی نے ثابت کردیا کہ ملک کی سلامتی سے زیادہ اہم عمران خان ہے : خواجہ آصف
وزیر دفاع خواجہ آصف نے پی ٹی آئی کے قومی سلامتی کی پارلیمانی کمیٹی کے اہم ترین اجلاس میں شرکت نہ کرنے پر رد عمل دیتے ہوئے کہا کہ پی ٹی آئی نے آج اس بات کو ثابت کردیا ہے کہ عمران خان اول و آخر ان کی ترجیح ہے،وطن کی سلامتی اور امن پی ٹی آئی کےلیے اہمیت نہیں رکھتے۔
سینئر رہنما مسلم لیگ ن اور وفاقی وزیر خواجہ آصف نےکہا کہ ’خان نہیں تو پاکستان نہیں‘ ان کا نصب العین ہے، وطن دہشت گردی کی آگ میں جل رہا ہے لیکن پی ٹی آئی اپنے مفادات کی سیاست کررہی ہے،اس سے بڑھ کے وطن دشمنی کیا ہو سکتی ہے۔
قبل ازیں پی ٹی آئی کے رہنما سلمان اکرم راجہ نے پریس کانفرنس کرتے ہوئے کہا تھا کہ ان کی جماعت قومی سلامتی کی کمیٹی کے اجلاس میں شرکت نہیں کرے گی تاہم انہوں نے کہاکہ علی امین گنڈاپور بطور وزیر اعلیٰ خیبرپختونخوا اجلاس میں شریک ہوں گے۔
گزشتہ رات پی ٹی آئی کی سیاسی کمیٹی کا اجلاس بھی منعقد ہوا جس کے اعلامیے میں کہاگیا کہ پارٹی رہنماؤں کی عمران خان سے ملاقات نہ کرائی گئی تو قومی سلامتی کمیٹی اجلاس میں شریک نہیں ہوں گے۔
قومی سلامتی پارلیمانی کمیٹی کا اہم ترین اجلاس شروع
واضح رہے کہ ملک کی سیکیورٹی صورتحال پر قومی سلامتی کی پارلیمانی کمیٹی کا اجلاس پارلیمنٹ ہاؤس میں شروع ہو چکا۔ اجلاس کا آغاز تلاوت قرآن مجید سے ہوا۔اجلاس کی صدارت اسپیکر قومی اسمبلی ایاز صادق کررہے ہیں۔
اجلاس میں وزیر دفاع خواجہ محمد آصف، وزیر اعظم کے مشیر رانا ثنا اللہ،امیر مقام، آرمی چیف جنرل سید عاصم منیر،ڈی جی آئی ایس آئی اور ڈی جی ایم او سمیت شرکا کی ایک بڑی تعداد اجلاس میں پہنچ چکی ہے۔
گورنر خیبرپختونخوا فیصل کریم کنڈی،وزیر اعلیٰ خیبرپختونخوا علی امین گنڈاپور، وزیر اعلیٰ بلوچستان سرفراز بگٹی، گورنر پنجاب سردار سلیم حیدر، وزیر اعلیٰ پنجاب مریم نواز شریف بھی اجلاس میں شرکت کےلیے پہنچ گئیں۔ اجلاس میں مولانا فضل الرحمٰن بھی شریک ہیں۔
