علی امین گنڈاپور کی سکیورٹی واپس لےلی گئی

سابق وزیرِاعلیٰ خیبر پختونخوا علی امین گنڈاپور کی بطور وزیرِاعلیٰ فراہم کی گئی تمام سیکیورٹی واپس لے لی گئی۔

ذرائع کے مطابق رات گئے سہیل آفریدی کی جانب سے کارروائی کرتے ہوئے سابق وزیرِاعلیٰ کی تمام سیکیورٹی اور تعینات اہلکاروں کو کلوز کر دیا گیا۔

اس اقدام کے بعد علی امین گنڈاپور کو سرکاری سیکیورٹی پروٹوکول حاصل نہیں رہے گا۔

ذرائع کا کہنا ہے کہ سابق وزیرِاعلیٰ کو ماضی میں کئی مرتبہ سیکیورٹی خطرات لاحق رہ چکے ہیں جبکہ ان کی رہائش گاہ پر دستی بم حملہ بھی ہو چکا ہے۔

ایسی صورتحال میں صوبے کے موجودہ امن و امان کے تناظر میں سیکیورٹی واپس لینے کے فیصلے کو بعض حلقے غیر متوقع قرار دے رہے ہیں۔

حکام کی جانب سے اس حوالے سے تاحال باضابطہ مؤقف سامنے نہیں آیا۔