بلال قریشی نے خوشگوار شادی شدہ زندگی کا راز بتا دیا؟

معروف اداکار بلال قریشی نے ایک دوسرے کی عزت کرنے کو خوشگوار شادی شدہ زندگی کا راز قرار دیتے ہوئے بتایا کہ دو افراد کے تعلقات میں محبت اور سچائی بنیادی جز ہے، اداکار حال ہی میں ایک پوڈ کاسٹ میں شریک ہوئے تھے جس دوران میزبان نے ان سے شادی کیلئے اہم بنیادی نکات کا سوال کیا۔ایک سوال کے جواب میں بلال قریشی نے کہا کہ شادی ایک فٹ بال میچ کی طرح ہے، فٹ بال کے میچ میں جس طرح ٹیم آدھے وقت میں ایک طرف اور آدھے وقت میں دوسری طرف ہوتی ہیں بالکل اسی طرح بیچلر لائف بھی آپ کے ہاف ٹائم کی طرح ہے جس کے بعد آپ کی شادی شدہ زندگی دوسرے حصے کے طور پر شروع ہوتی ہے۔انہوں نے کہا کہ خوشگوار شادی شدہ زندگی کا راز عزت میں پنہاں ہے، عزت محبت پیار یہ سب چیزیں شادی شدہ زندگی کے بنیادی جز ہیں، اگر کسی بھی رشتے سے عزت نکال دی جائے تو یہ رشتہ بہت ہلکا ہو جاتا ہے اور ایک ایسا رشتہ بن جاتا ہے جو کبھی بھی کہیں بھی برباد ہوسکتا ہے، یوں سمجھ لیں کہ عزت کسی بھی رشتے کو محفوظ رکھتا ہے، ایک سے زائد شادیوں کے سوال پر اداکار کا کہنا تھا کہ شادی ایک سے ہونی چاہئے لیکن نیک سے ہونی چاہئے۔اداکار نے مزید کہا کہ شادی سے پہلے کی زندگی میں ہمیں رشتے اور سہولیات دی جاتی ہیں لیکن شادی کے بعد آپ دینا شروع کرتے ہیں، اگر کوئی شخص چاہتا ہے اسے صرف ہر رشتے میں دیا ہی دیا جائے تو اسے چاہئے کہ وہ شادی نہ کرے کیوںکہ اس کا مطلب ہے کہ آپ شادی کیلئے ذہنی طور پر تیار نہیں ہیں، کائنات کا سب سے خوبصورت، مکمل رشتہ شادی ہے اگر آپ اس رشتے کو خوبصورتی سے مکمل کریں تو اس رشتے سے بڑھ کر کچھ نہیں ہے۔بلال قریشی نے شادی کیلئے پیسہ کتنا ضروری ہے کے سوال پر بتایا کہ شادی کے وقت میرے پاس صرف 8 لاکھ اور سیکنڈ ہینڈ گاڑی تھی، اگرچہ میں آج بھی ایک بہت بڑا میگا اسٹار نہیں ہوں لیکن میرے پاس جو بھی کچھ ہے وہ میری بیگم کے نصیب کا ہے، بے شک ساری بات نصیب کی ہے لیکن آپ کی نیت اچھی اور سچی ہونی چاہئے، میرا بھی ماننا ہے کہ شادی کیلئے آپ کے پاس بنیادی ضرورتوں کیلئے پیسہ ہونا بھی ضروری ہے۔