جعفر ایکسپریس آپریشن کے دوران بھارتی میڈیا اور پی ٹی آئی کی زبان ایک جیسی تھی : خواجہ آصف

وزیر دفاع خواجہ آصف کا کہنا ہے کہ بلوچستان میں جعفر ایکسپریس آپریشن کے دوران پی ٹی آئی اور بھارتی میڈیا ملتی جلتی زبان بولتے رہے۔ ہم پر لازم ہےکہ سیاسی مفادات سے بالا ہو کر قومی وحدت کا مظاہرہ کریں۔

مرکزی رہنما مسلم لیگ ن خواجہ آصف نے کہا کہ بہادر سکیورٹی فورسز  نے بڑے سانحہ سے ملک کو بچالیا اور 33 دہشت گردوں کو جہنم واصل کر کے جعفر ایکسپریس کے تمام یرغمالیوں کو رہا کروالیا گیا۔

خواجہ آصف نے کہاکہ دوران آپریشن پی ٹی آئی اور بھارتی میڈیا ملتی جلتی زبان بولتے رہے،افغانستان سے بھی سوشل میڈیا پر ایسی ہی زبان بولی جاتی رہی،ہم پر لازم ہےکہ سیاسی مفادات سے بالا ہو کر قومی وحدت کا مظاہرہ کریں۔

جعفرایکسپریس حملہ،امریکہ،چین،ایران،یورپی یونین کی مذمت

یاد رہےکہ منگل کو بولان میں دہشت گردوں نے کوئٹہ سے پشاور جانے والی جعفر ایکسپریس پر حملہ کیا تھا اور مسافروں کو یرغمال بنا لیا تھا جن میں عورتیں اور بچے بھی شامل تھے۔

بعد ازاں سکیورٹی فورسز نے طویل آپریشن کے بعد تمام 33 دہشت گردوں کو ہلاک کر دیا جب کہ دہشت گرد حملے میں 21 مسافر اور 4 سکیورٹی فورسز کے جوان شہید ہوئے۔