حکومت کا مالی سال کے بجٹ میں صنعتوں کے فروغ کے نئے منصوبوں کے لیے فنڈز رکھنےکا فیصلہ
وفاقی حکومت نےآئندہ مالی سال کےبجٹ میں صنعتوں کے فروغ کے نئے منصوبوں کےلیے فنڈز رکھنےکا فیصلہ کیا ہے۔
بجٹ دستاویز کےمطابق پاکستان اسٹیل کی زمین پر خصوصی اقتصادی زون کے قیام کے لیےبھی فنڈز رکھنے کی تجویز ہے جبکہ نئے منصوبےکےلیےبجٹ میں 50 کروڑ روپے مختص کرنے کی تجویز ہے۔
پاکستان اسٹیل کی مجموعی طور پر 6 ہزار400 ایکڑ زمین خصوصی اقتصادی زون کے لیےمختص ہو گی، پاکستان اسٹیل اور کراچی انڈسٹریل پارک کو وفاقی خصوصی اقتصادی زون کے طور پرایک ساتھ تیار کیا جائے گا، منصوبے کو کراچی انڈسٹریل پارک (وفاقی خصوصی اقتصادی زون)کا نام دیا جائے گا۔
وزیراعظم آفس کی تزئین وآرائش کے لیے 6 کروڑ 50 لاکھ روپے رکھنےکی تجویز پیش
دستاویز کے مطابق پہلےمرحلے میں کراچی انڈسٹریل پارک کے 1500 ایکڑ میں سے 500 ایکڑ پر بلاک اےتیار کیا جائےگا، 1500 ایکڑ پر پھیلا کراچی انڈسٹریل پارک پاکستان اسٹیل کی اراضی پر تیار کیا جا رہا ہے۔
کراچی انڈسٹریل پارک سی پیک کے تحت ملک میں تیار کیے جانے والے 9 خصوصی اقتصادی زونز میں سے ایک ہے، بجٹ میں ایک ہزارانڈسٹریل اسٹچنگ یونٹس کے قیام کے نئے منصوبے کےلیے فنڈز کی تجویز بھی ہے، سمیڈا کے تحت دوسرے مرحلے کےاس نئےمنصوبے کےلیے 25 کروڑ روپے رکھنے کی تجویز ہے۔
خیال رہےکہ وفاقی حکومت کا سالانہ بجٹ 10 جون کو پیش کیا جائےگا۔
