وزیراعظم نے گوادرایئرپورٹ کو پاک چین دوستی کی علامت قرار دیدیا
وزیر اعظم محمد شہباز شریف کا کنا ہے کہ گوادر کا نیا بین الاقوامی ائیرپورٹ چین-پاکستان عظیم دوستی کی نمایاں مثال ہے۔بین الاقوامی معیار اور جدید سہولیات سے آراستہ ایئرپورٹ تعمیر کرنے پر ہم عظیم دوست چین کے مشکور ہیں۔نیو گوادر انٹرنیشنل ایئرپورٹ کےفعال ہونے سے علاقے میں خوش حالی آئےگی اور روزگار کےمواقع پیدا ہوں گے۔ نیو گوادر انٹرنیشنل ایئرپورٹ کو مصروف ٹرانزٹ پوائنٹ بنانے کےحوالے سے قابل عمل حکمت عملی ترتیب دی جائے۔
وزیر اعظم محمد شہباز شریف کی زیر صدارت نیو گوادر انٹرنیشنل ائیرپورٹ سے متعلق امور پر اجلاس ہوا۔
اجلاس میں وزیر دفاع خواجہ محمد آصف،وفاقی وزیر قانون اعظم نذیر تارڑ، وفاقی وزیر اقتصادی امور احد چیمہ،وفاقی وزیر خزانہ محمد اورنگزیب اور متعلقہ اعلیٰ سرکاری افسران نے شرکت کی۔
وزیر خارجہ اسحٰق ڈار،وفاقی وزیر نجکاری و سرمایہ کاری عبدالعلیم خان بذریعہ وڈیو لنک اجلاس میں شریک ہوئے۔
اجلاس کو بریفنگ میں بتایا گیاکہ نیو گوادر انٹرنیشنل ایئرپورٹ رقبےکے لحاظ سے ملک کا سب سے بڑا ہوائی اڈہ ہے،گوادر ایئرپورٹ دنیا کا سب سےبڑا ہوائی جہاز اے-380 ہینڈل کرسکتا ہے،اس ایئرپورٹ سے 40 لاکھ مسافر سالانہ سفر کرسکیں گے، گوادر سے مسقط کےلیے پروازوں کا آغاز 10 جنوری سے ہوجائے گا۔
وزیر اعظم شہباز شریف نےکہا کہ نیو گوادر انٹرنیشنل ایئرپورٹ کےفعال ہونے سے علاقے میں خوش حالی آئے گی اور روزگار کےمواقع پیدا ہوں گے،انہوں نے ہدایت کی کہ نیو گوادر انٹرنیشنل ایئرپورٹ کو مصروف ٹرانزٹ پوائنٹ بنانے کےحوالے سے قابل عمل حکمت عملی ترتیب دی جائے۔
وزیر اعظم نے نیو گوادر انٹرنیشنل ایئرپورٹ کی سکیورٹی کےلیے فول پروف انتظامات کرنےاور ملک خصوصاً بلوچستان کے دیگر علاقوں درمیان رابطہ سڑکوں کا نظام بہتر بنانے کی ہدایات بھی جاری کیں۔
اجلاس کو بتایاگیاکہ پاکستان ایئرپورٹ اتھارٹی کی جانب سے نیو گوادر انٹرنیشنل ایئرپورٹ کو ایرو ڈروم سرٹیفکیٹ جاری کردیا گیا،جب کہ پاکستان کسٹمز نے بھی اس ایئرپورٹ کو نوٹیفائی کردیا ہے۔
نیوگوادر ایئرپورٹ پر پاکستان ایئرپورٹ اتھارٹی،ایئرپورٹ سکیورٹی فورس،پاکستان کسٹمز،اینٹی نارکوٹکس فورس،ایف آئی اے سمیت بارڈر ہیلتھ سروس کا عملہ تعینات کیا جاچکا ہے۔
پی آئی اے کے کراچی اور گوادر کےلیے موجودہ فلائٹ آپریشن کے دورانیے کو جلد ہی ہفتے میں تین بار کیا جائےگا،پاکستان کی نجی ائیر لائنز کی چین، عمان اور متحدہ عرب امارات کی ایئرلائنز سے گوادر سے ملکی اور بین الاقوامی فلائٹ آپریشنز شروع کرنے کےحوالے سے بات چیت جاری ہے۔
بریفنگ میں بتایا گیاکہ نیو گوادر ایئرپورٹ پر کولڈ اسٹوریج،ویئر ہاؤسز،کوریئر سروسز کی سہولیات،کارگو شیڈز،تکنیکی گراؤنڈ سپورٹ آلات، فیول فارمز،ہوٹلز اور شاپنگ مالز کےلیے جگہ مختص کی گئی ہے۔
پارا چنار سڑکیں کھلوانا علی امین گنڈاپور کا کام ہے : عظمیٰ بخاری
ایئرپورٹ پر بینکوں کی برانچز کےقیام اور اے ٹی ایم مشینوں کی تنصیب کےحوالے سے اسٹیٹ بینک آف پاکستان سے رجسٹرڈ تمام بینکوں سے رابطہ کیاگیا ہے۔
گوادر انٹرنیشنل ایئرپورٹ سے بذریعہ سڑک رابطہ بہتر بنانے کےحوالے سے ایسٹ -بے ایکسپریس وے کا پہلا حصہ مکمل ہوچکا ہے،دوسرے حصے کی فزیبلیٹی تیار کی جارہی ہے۔
