پاکستانی گلوکار ابرار الحق اور اداکارہ و ماڈل ایمان علی لمبے وقفے کے بعد ایک ساتھ جلوہ گر ہوں گے۔ گلوکار کا نیا پنجابی گانا ’’رانو‘‘ جلد ریلیز کیا جائے گا۔

گانے کے ہدایتکار اسد ممتاز نے بتایا کہ گانے کی ہیروئن کے لیے دو سے تین فنکاراؤں کے نام دیے گئے تھے لیکن ایمان علی کو بطور ہیروئن کاسٹ کرنے کا فیصلہ ابرار الحق کا تھا۔انہوں نے کہا کہ ایمان علی ایک قابل اور انتہائی سنجیدگی سے کام کرنے والی اداکارہ ہیں اور اس سے قبل بھی ابرار الحق کی البم ’’میں گڈی آپ چلاواں گا‘‘ کے گانے ’’سانوں تیرے نال‘‘ میں جلوہ گر ہوچکی ہیں۔

ہدایتکار اسد ممتاز نے کہا کہ گانے میں ایمان علی چندیگر کی رانو کے کردار میں دکھائی دیں گی۔

اس سوال پر کہ کیا ’’رانو‘‘ روایتی شوخ و چنچل پنجاب کی لڑکی ہے؟ اسد نے جواب دیا کہ ’’پٹاخہ قسم کی ہیروئن دکھانے والا ٹائم گزر گیا ہے میرا خیال ہے اب ہم مختلف کہانی کو گانوں میں جگہ دے رہے ہیں۔‘‘

گانے کی شوٹ ستمبر میں لاہور میں کی جائے گی۔