پنجاب میں الیکشن کیلئے آر اوز بیوروکریسی سے لینے کا فیصلہ
الیکشن کمیشن نے پاکستان تحریک انصاف کی درخواست کو مسترد کرتے ہوئے پنجاب میں ہونے والے عام انتخابات کے لیے انتخابی افسران بیوروکریسی سے لے لیے ہیں۔الیکشن کمیشن نے انتخابات کیلئے آر اوز، ڈی آر اوز اور اے آر اوز کی تعیناتی کردی ہے اور یہ تمام تعیناتیاں بیورو کریسی سے کی گئی ہیں، پنجاب میں انتخابات کے لیے 36 ڈی آر اوز کی تعیناتی کردی گئی اور اس سلسلے میں ان ڈی آر اوز کے ساتھ ساتھ آر اوز کو بھی بیوروکریسی سے لیا گیا ہے۔
الیکشن کمیشن نے پنجاب میں انتخابی عمل کے لیے کے لیے 297 آر اوز اور 594 اے آر اوز کی بھی تعیناتی بھی کردی ہے، کمیشن نے خواتین اور اقلیتوں کی نشستوں کے لیے بھی آر او کی تعیناتی کردی ہے اور خواتین اور اقلیتوں کی نشستوں کے لیے سعید گل کی بطور آر او تعیناتی کردی گئی۔
گزشتہ روز پاکستان تحریک انصاف کے وفد نے چیئرمین عمران خان کی زیر قیادت چیف الیکشن کمشنر سکندر سلطان راجا سے ملاقات کی تھی اور مطالبہ کیا تھا کہ ریٹرننگ افسران بیورو کریسی کے بجائے عدلیہ سے ہونے چاہئیں۔ذرائع کے مطابق سابق حکمران جماعت نے موجودہ نگراں حکومت کے اثرورسوخ کی نشاندہی کرتے ہوئے بیوروکیریسی کی غیرجانبداری کے حوالے سے تحفظات کا اظہار کیا ہے۔
ان کا کہنا تھا کہ چیف الیکشن کمشنر نے پی ٹی آئی کو بتایا کہ الیکشن کمیشن آف پاکستان نے عدلیہ سے آر اوز لینے کی کوشش کی تھی لیکن لاہور ہائی کورٹ نے اس معاملے پر معذرت کر لی، انہوں نے کہا کہ اب ہمارے پاس بیوروکریسی سے مدد لینے کے سوا اور کوئی چارہ نہیں اور اس سلسلے میں کسی بھی قسم کی تاخیر الیکشن میں التوا کا سبب بنے گی۔مذکورہ ملاقات کے بعد شاہ محمود قریشی نے میڈیا سے گفتگو کرتے ہوئے کہا تھا کہ ہم نے یہ ملاقات چیئرمین عمران خان کی اجازت سے کی تھی۔
ان کا کہنا تھا کہ الیکشن کمیشن پر شفاف انتخابات کی بہت بڑی ذمہ داری عائد ہے، ہم نے منصفانہ اور شفاف انتخابات کی بات کی، ملاقات بہت اچھے ماحول میں ہوئی، ہم نے الیکشن کمیشن کے سامنے اپنے تحفظات کا اظہار کیا، الیکشن کمیشن نے تحمل سے ہماری بات سنی، ہم اپنے چیئرمین کو ملاقات کے بارے میں آگاہ کریں گے اور میں اس ملاقات سے مطمئن ہوں۔
دوسری جانب آج الیکشن کمیشن آف پاکستان کا اجلاس منعقد ہوا جس میں آئندہ انتخابات سے قبل پنجاب اور خیبرپختونخوا میں امن و امان کی صورتحال پر تبادلہ خیال کیا گیا، الیکشن کمیشن کا اجلاس چیف الیکشن کمشنر سکندر سلطان راجا کی زیر صدارت منعقد ہوا جس میں کمیشن کے اراکین، قانون نافذ کرنے والے اداروں اور پریمیم انٹیلی جنس ایجنسیوں کے نمائندوں نے شرکت کی۔
شرکا کو آزادانہ، منصفانہ، پرامن اور شفاف انتخابات کے حوالے سے دونوں صوبوں میں سیکیورٹی کی موجودہ صورتحال پر تفصیلی بریفنگ دی گئی۔اجلاس کے اختتام پر چیف الیکشن کمشنر نے تمام شرکا کا شکریہ ادا کرتے ہوئے اس اعتماد کا اظہار کیا کہ فراہم کردہ معلومات کمیشن کو دونوں صوبوں میں پرامن اور شفاف انتخابات کو یقینی بنانے کے لیے ضروری اقدامات کرنے کے قابل بنائے گی۔
