66سالہ خاتون کا سائیکل پردنیاگھومنےکااعلان

12ممالک میں سائیکل کے ذریعے تنہا سفر کرنے والی 66 سالہ خاتون نے پوری دنیا گھومنے کا فیصلہ کرلیا۔

چین سے تعلق رکھنے والی 66 سالہ ڈونگ جو نے حالیہ برسوں میں سائیکل پر 3 براعظموں کے 12 ممالک کی سیر کی ہے۔ان ممالک میں کمبوڈیا، فرانس اور آسٹریلیا بھی شامل ہیں اور اب انہوں نے مزید 88 ممالک گھومنے کا فیصلہ کیا ہے۔

خاتون نے بتایا کہ میرا مقصد کم از کم 100 ممالک کا دورہ کرنا ہے، سفر ایک نشے کی طرح ہے، جو ایک بار اسے چکھ لے، خود کو روک نہیں سکتا’۔ایڈونچر پسند ہونے کے باوجود ڈونگ جو کو متعدد چیلنجز کا سامنا ہے۔وہ صرف چینی زبان بول سکتی ہیں اور دیگر ممالک میں رابطے کے لیے زبانیں ترجمہ کرنے والی ایپس پر انحصار کرتی ہیں۔ان کا سفری بجٹ بھی محدود ہے اور اکثر وہ پارکس یا قبرستانوں میں قیام کرتی ہیں یا ان اجنبی افراد کے گھر چلی جاتی ہیں جو انہیں قیام کی دعوت دیتے ہیں۔

انہیں سائیکل چلانے کا شوق 2013 میں اس وقت ہوا جب طلاق کے بعد وہ ڈپریشن کا شکار ہوگئی تھیں۔