اقوام متحدہ کی سیلاب زدگان کیلئے 160 ملین ڈالرامداد کی اپیل

پاکستان میں سیلاب متاثرین کی مدد کیلئے اقوام متحدہ نے عالمی برادری سے 160 ملین ڈالر ہنگامی امداد کی اپیل کردی۔

اقوام متحدہ کے رکن ممالک سے ہنگامی مدد طلب کرنے کے حوالے سے دفتر خارجہ میں تقریب منعقد ہوئی، جس سےبذریعہ ویڈیو لنک خطاب کرتے ہوئےسیکرٹری جنرل اقوام متحدہ انتونیو گوتریس نےکہا کہ پاکستان میں سیلاب سے انفرااسٹرکچر تباہ ہوگیا، سیلاب سے متاثرہ افراد کے لیے پاکستان کو امداد کی ضرورت ہے، گرین ہاؤس گیسز عالمی حدت میں اضافے کا سبب بن رہی ہیں، سیلاب متاثرین کے لیے پاکستان کو 160 ملین ڈالر امداد کی ضرورت ہے۔

اس موقع پر وزیر خارجہ بلاول بھٹو نے مشکل وقت میں پاکستان کی ہنگامی امدادکی اپیل کرتے ہوئے کہا کہ موسمیاتی تبدیلی کےباعث ہیٹ ویونےپاکستان میں تمام ریکارڈتوڑدیئے اور شدیدبارشوں و سیلاب کاسامناہے، پاکستان شدیدموسمیاتی تبدیلیوں کی زدمیں ہے ، سیلاب نےتباہی مچادی ہے۔

وزیر خارجہ بلاول بھٹو نے کہا کہ 72اضلاع میں3کروڑافرادکوسیلابی صورتحال کاسامناہے، مواصلاتی نظام اورفصلیں بربادہوگئیں اور معیشت کوشدیدنقصان پہنچاہے، متاثرین کیلیےخوراک،چھت کی فراہمی اوربحالی بڑاچیلنج ہے، انکم سپورٹ پروگرام سےمتاثرین کی مددکی جارہی ہے۔