700 سالہ پرانے قلعے میں کترینہ کی شادی کی تیاریاں

کترینہ کیف اور وکی کوشل کی شادی کے لیے راجستھان کا 700 سال پرانا قلعہ مکمل طور پر بُک کرلیا گیا ہے جہاں 9 سے 12 دسمبر تک شادی کی تقریبات جاری رہیں گی۔
راجستھان کے شہر سوائی مادھوپور سے قریب 18 کلو میٹر دور ایک پہاڑی چوٹی پر چوتھ کا برورا کے مقام پر ایک 700 سال پرانا قلعہ واقع ہے جسے حال میں ایک فائیو سٹار ہوٹل میں تبدیل کر دیا گیا ہے۔ اس کا نام سکس سینسز فورٹ ہوٹل رکھا گیا ہے۔ اگرچہ وکی یا کترینہ کی جانب سے اب تک اپنی شادی کا اعلان نہیں کیا گیا مگر بتایا جا رہا ہے کہ مہمان 4 دسمبر سے ہی آنا شروع ہو جائیں گے۔ شادی کی تقریبات کے لیے ہوٹل کے کمرے 12 دسمبر تک بُک کیے گئے ہیں۔
اس قلعے میں 48 کمرے ہیں اور ایک کمرے کا کرایہ 50 ہزار سے سات لاکھ کے درمیان ہے۔ کترینہ اور وکی کے لیے الگ الگ سویٹ بُک کیے گئے ہیں جن کا ایک رات کا کرایہ سات لاکھ روپے ہے۔ شادی کی تقریبات 4 دسمبر کو سنگیت سے شروع ہوں گی جبکہ شادی کی سب سے اہم تقریب 9 دسمبر کو ہوگی۔ 8 دسمبر کو مہندی کی رسم نبھائی جائے گی جس کے لیے دنیا کی مشہور ترین سوجات مہندی منگوائی گئی ہے۔ تاحال شادی کے مہمانوں کی کوئی لسٹ جاری نہیں کی گئی مگر خیال ہے کہ بالی وڈ، کاروبار اور سیاست کی دنیا سے کچھ معروف لوگ شرکت کریں گے۔ خیال رہے کہ گذشتہ کئی دنوں سے بالی وڈ اداکار وکی کوشل اور اداکارہ کترینہ کیف کی شادی کی خبریں ذرائع ابلاغ میں گردش کر رہی ہیں۔ راجستھان میں حکام شادی کے موقع پر امن برقرار رکھنے کے لیے انتظامات کر رہے ہیں۔ 3 دسمبر کو شہر سوائی مادھو پور میں ضلعی مجسٹریٹ راجندر کشن کی سربراہی میں ایک میٹنگ بلائی گئی تھی تاکہ اس شادی سے متعلق انتظامات طے کیے جا سکیں۔ اس میں ویڈنگ پلینر، ہوٹل مالکان اور پولیس حکام شامل تھے۔راجندر کشن نے بی بی سی کو بتایا کہ ’مقامی انتظامیہ سے ملاقات کی گئی ہے۔ چوتھ کا برورا میں صفائی اور امن و امان کی ہدایات دی گئی ہیں۔ کوئی بُراواقعہ نہیں ہوگا اور ٹریفک روانی میں رہے گی۔‘ اس میٹنگ میں پبلک ٹرانسپورٹ کے بارے میں بھی بات کی گئی۔ان کا کہنا ہے کہ شادی کی تقریبات سات سے 10 دستمبر تک ہوں گی اور اس میں 120 مہمان شرکت کریں گے۔
راجندر کشن نے بتایا کہ ’کووڈ گائیڈلائنز پر عملدرآمد کی ہدایات دی گئی ہیں۔ مہمانوں کے لیے لازم ہوگا کہ انھیں ویکسین کی دونوں خوراکیں لگی ہوں۔ ہوٹل کی انتظامیہ ہیلپ ڈیسک لگائے گی۔ مہمانوں کو یہ ہدایت دی جا چکی ہیں۔‘ان کے مطابق مہمانوں کے لیے ویکسین کی دونوں خوراکیں اور کورونا کے پی سی آر ٹیسٹ لازم ہوں گے۔ ویکسین کے بغیر مہمانوں کو آنے کی اجازت نہیں ہوگی۔سوائی مادھوپور میں ایڈیشنل ڈسٹرکٹ کلیلٹر ڈاکٹر سورج سنگھ نے خط میں لکھا ہے کہ ’وکی کوشل اور کترینہ کیف کی شادی کی تقریب کے انتظامات سے قبل شائقین پر قابو، امن و امان، ممکنہ واقعات اور ضروری انتظامات کرنے کی ضرورت ہے۔
ذرائع ابلاغ کی خبروں کے مطابق کترینہ اور وکی کوشل چھ دسمبر کو سوائی مادھوپور آئیں گے۔ہوٹل کی انتظامیہ سے رابطہ کیے جانے پر انھوں نے ہمیں اس شادی کے بارے میں کچھ نہیں بتایا۔ پھر جب ہم نے اس قلعے میں چھ سے آٹھ دسمبر کے لیے کمرہ بُک کرنا چاہا تو انتظامیہ نے انکار کر دیا اور کہا کہ سات سے 12 دسمبر تک بکنگ نہیں ہو سکتی۔ ایک مقامی صحافی کے مطابق مہمانوں کے علاوہ ڈرائیورز اور سکیورٹی حکام سمیت دیگر عملے کے لیے قریبی ہوٹلوں میں بکنگ کروائی گئی ہے۔راجستھان میں اس سے پہلے بھی معروف شخصیات کی شادیاں ہوئی ہیں۔ کئی بڑی کاروباری شخصیات اور بالی وڈ کے ستاروں نے جھیلوں کے شہر اودے پور میں شادی کی ہے۔ مگر سوائی مادھوپور میں یہ اپنی نوعیت کی پہلی شادی ہوگی۔ کترینہ اور وکی کے مینیجرز کی ٹیمیں بھی ہوٹل میں شادی کے انتظامات میں مصروف ہیں۔