پی ایس ایل کے10ویں ایڈیشن کیلئےکھلاڑیوں کی رجسٹریشن شروع

ایچ بی ایل پاکستان سپر لیگ کے10ویں ایڈیشن کیلئےغیرملکی کھلاڑیوں کی رجسٹریشن ونڈو کے ساتھ ساتھ ٹریڈ ونڈو کھول دی گئی۔

 کھلاڑیوں کی کیٹیگری کی تجدید کااعلان17 دسمبرکوکیاجائے گا جبکہ کھلاڑیوں کی کیٹیگری میں تنزلی اوربرقرار رکھنےکا عمل رواں ماہ کےدوران کیا جائےگا۔

پی ایس ایل پلیئرز کا ڈرافٹ11جنوری2025 کو ہوناہے،ڈرافٹ کےمقام اوروقت کااعلان مقررہ وقت پرکیاجائےگا۔

ایچ بی ایل پی ایس ایل کےچیف ایگزیکٹو آفسر سلمان نصیر کا کہنا ہےکہ ہم غیر ملکی کھلاڑیوں کے ساتھ ساتھ ٹریڈ ونڈو کیلئےرجسٹریشن کے عمل کوکھولنے کا اعلان کرتے ہوئے بہت خوش ہیں۔

انہوں نے کہا کہ یہ ایچ بی ایل پاکستان سپر لیگ کے 10ویں ایڈیشن کی تیاریوں کاایک دلچسپ آغاز ہے،ایچ بی ایل پی ایس ایل ایک ایسا برانڈ ہےجس پر ہم سب کوفخر ہے۔

ان کا کہنا تھا کہ 2016 میں اپنےقیام کےبعد سے اپنے فرنچائز مالکان، تجارتی شراکت داروں اور اسٹیک ہولڈرزکے ساتھ مل کر ہم نےایک طویل اور کامیاب سفر کا آغاز کیا ہے۔

سلمان نصیرنے کہا کہ کھیلی جانےوالی کرکٹ کا معیاراورمسابقت کسی سے پیچھے نہیں ہے اور ہم اپنے شائقین کی توقعات پر پورا اترنے کی کوشش کریں گے۔

چیف ایگزیکٹو افسر پی ایس ایل نے کہا کہ تاریخی10 واں سیزن سب کیلئےمزید جوش و خروش لانے کا وعدہ کرتا ہے اور ایچ بی ایل پی ایس ایل ٹیم شائقین کوبےمثال تجربات فراہم کرنے کیلئےانتھک محنت کرنے کیلئےپرعزم ہے۔

بیان کے مطابق ایچ بی ایل پی ایس ایل کے 10ویں ایڈیشن کے لیے غیر ملکی کھلاڑیوں کی رجسٹریشن ونڈو کے ساتھ ساتھ ٹریڈ ونڈو کھول دی گئی ہے، کھلاڑیوں کی کیٹیگری کی تجدید کا اعلان منگل17دسمبر کو کیا جائے گاجبکہ کھلاڑیوں کی کیٹیگری میں تنزلی اور برقرار رکھنے کا عمل رواں ماہ کے دوران کیاجائے گا۔

واضح رہے کہ 2016 سےاسلام آباد یونائیٹڈ تین بار چیمپئن بن چکی ہے،جس میں لیگ کا افتتاحی ایڈیشن(2016)تیسرا(2018) اورآخری ایڈیشن(2024) شامل ہے۔

اس کے علاوہ لاہور قلندرز 2022 اور 2023 میں دو بارجیت چکی ہے،پشاور زلمی2017 کے ایڈیشن کی چیمپئن رہی، کوئٹہ گلیڈی ایٹرز نے2019 کا ایڈیشن جیتا جب کہ کراچی کنگز نے 2020 میں پہلا ٹائٹل اپنے نام کیا،2021 میں ملتان سلطانز فاتح بن کر ابھری۔