سندھ کابینہ میں رد و بدل کا امکان، سعید غنی سے وزارت واپس لیے جانے کا فیصلہ

سندھ کابینہ میں ممکنہ تبدیلیوں کی اطلاعات سامنے آئی ہیں جن کے تحت اہم وزرا کے محکموں میں رد و بدل متوقع ہے، جب کہ بعض وزرا کو تبدیل کیے جانے کا بھی امکان ہے۔

ذرائع کے مطابق وزیر اعلیٰ سندھ مراد علی شاہ سے مختلف وزرا کی ملاقاتوں کا سلسلہ جاری ہے، جن میں آئندہ متوقع تبدیلیوں پر مشاورت کی جا رہی ہے۔ ان ملاقاتوں میں سعید غنی، جام خان شورو اور اسماعیل راہو بھی وزیر اعلیٰ سے ملاقات کریں گے۔

ذرائع کا کہنا ہے کہ وزیر محنت سندھ شاہد تھہیم کو ان کے عہدے سے ہٹانے کا فیصلہ کر لیا گیا ہے، اور ان کی جگہ بدین سے منتخب رکنِ سندھ اسمبلی اسماعیل راہو کو وزارت دینے کا قوی امکان ہے۔

اسی طرح، صوبائی وزیر سعید غنی سے محکمہ بلدیات کا قلمدان واپس لیے جانے کا فیصلہ کیا گیا ہے۔ وہ سندھ کابینہ کے اہم ارکان میں شمار ہوتے ہیں، تاہم ذرائع کے مطابق یہ اقدام کابینہ میں توازن اور کارکردگی کے جائزے کے تحت کیا جا رہا ہے۔

مزید برآں، جام خان شورو کو محکمہ منصوبہ بندی و ترقیات (P&D) کا اضافی قلمدان سونپے جانے پر غور کیا جا رہا ہے۔

ذرائع کا کہنا ہے کہ ان تبدیلیوں کا مقصد کارکردگی بہتر بنانا اور محکموں میں نئی توانائی پیدا کرنا ہے۔ کابینہ میں یہ رد و بدل آئندہ چند روز میں متوقع ہے۔