پاکستان کرکٹ بورڈ نےآئی سی سی کو خط میں اہم سوالات اٹھادیئے

پاکستان کرکٹ بورڈ کی جانب سےانٹرنیشنل کرکٹ کونسل کےسربراہ کو لکھے گئے خط میں چند اہم ترین سوالات کے جواب مانگے گئے ہیں۔

 یاد رہے کہ چیمپینز ٹرافی فروری 2025 میں پاکستان میں منعقد کی جا رہی ہے لیکن بھارتی ٹیم نےپاکستان آنے سے انکار کر دیا ہے۔

باخبرذرائع کے مطابق پی سی بی نےآئی سی سی سے تحریری طور پرپوچھا ہے کہ بھارتی کرکٹ بورڈ نےانہیں کب یہ اطلاع دی کہ انڈین کرکٹ ٹیم پاکستان میں ہونےوالی چیمپینز ٹرافی میں شرکت نہیں کرپائے گی۔

پاکستان کرکٹ بورڈ نے انٹرنیشنل کرکٹ کونسل سے یہ سوال بھی کیا ہے کہ کیا بھارتی کرکٹ بورڈ نےآئی سی سی کواپنےانکار سےتحریری طور پر آگاہ کیا ہے۔

 پی سی بی نے لکھا ہے کہ اگر بھارت نے تحریری طور پر پاکستان آنے سے معذرت کی ہے تو اس کی کیا وجوہات بیان کی گئی ہیں۔

پی سی بی نے آئی سی سی سے انڈین کرکٹ بورڈ کی تحریری معذرت کی کاپی بھی مانگی ہے تا کہ ان وجوہات کا جائزہ لیا جا سکے جن کی بنیاد پر یہ فیصلہ کیا گیا ہے۔

ذرائع کے مطابق پی سی بی نے آئی سی سی سے یہ سوال بھی پوچھا ہے کہ اس نے بھارتی کرکٹ بورڈ کے اپنی ٹیم بھیجنے سے انکار پر کیا جواب دیا ہے۔

 ذرائع کا کہنا ہے کہ پاکستان کرکٹ بورڈ ان تمام سوالات کے جواب لینے کے بعد اپنی قانونی ٹیم سے مشورہ کرے گا اور اپنی حکومت سے گائیڈنس لے گا تا کہ آئندہ کا پلان ترتیب دیا جا سکے۔

 تاہم ذرائع کا کہنا ہے کہ اگر بھارت واقعی اپنی کرکٹ ٹیم پاکستان نہیں بھیجتا اور آئی سی سی بھارتی انکار کو تسلیم کر لیتا ہے تو پاکستان کسی بھی صورت چیمپینز ٹرافی کے دوران بھارتی کرکٹ ٹیم کے ساتھ کوئی میچ نہیں کھیلے گا۔