اداکارہ انوشے اشرف "رکشے” کی فین کیوں ہو گئیں؟
ماڈل و اداکارہ انوشے اشرف بھی رکشے کی فین نکلیں، کراچی کی سڑکوں پر رکشے میں سواری کی ویڈیو سوشل میڈیا پر وائرل ہوگئی، اداکارہ نے اپنی ویڈیو کو ٹوئیٹر پر مداحوں کے ساتھ شیئر کیا۔
انوشے اشرف نے رکشہ میں سفر کرنے کے دوران بنائی گئی اپنی ویڈیو کو شیئر کرتے ہوئے رکشے کو سستی اور معیاری سواری قرار دیا اور ساتھ ہی مطالبہ کیا کہ پبلک ٹرانسپورٹ کو ہر کسی کے لیے محفوظ اور میسر بنایا جانا چاہئے۔
انوشے اشرف کو ویڈیو میں رکشے میں بیٹھ کر مزے کرتے ہوئے دیکھا جا سکتا ہے اور انہوں نے اپنی ٹوئٹ میں رکشے کے سفر کو "ایڈونچر” بھی قرار دیا، انہیں رکشے میں سوار دیکھ کر اچھی سواری کی پیش کش بھی کی گئی لیکن انہوں نے ’ایڈونچر‘ کی خاطر رکشے میں سفر کو ترجیح دی۔انوشے اشرف نے لکھا کہ رکشے کی سواری نہ صرف سستی ہے بلکہ یہ معیاری اور قدرے محفوظ بھی ہوتی ہے، آپ خطرے کے پیش نظر کسی وقت بھی رکشے سے کود سکتے ہیں۔
انہوں نے اپنی ویڈیو شیئر کرتے ہوئے لکھا کہ ممکن ہے کہ بعض لوگ ایک امیر اور خوشحال شخص کو رکشے میں سفر کرتا دیکھ کر پریشان ہوئے ہوں لیکن انہیں یہ سمجھنےکی ضرورت ہے کہ پبلک ٹرانسپورٹ کو ہر کسی کے لیے عام کرنے کی ضرورت ہے۔
ماڈل و اداکارہ کی ٹوئٹ کو متعدد افراد نے ری ٹوئٹ کرتے ہوئے انہیں یاد دلایا کہ رکشے کی سواری اب سستی نہیں رہی بلکہ آج کل کے دور میں رکشے میں سفر کرنے والے لوگ امیر کہلاتے ہیں۔اسی طرح بعض لوگوں نے انوشے اشرف کو یاد دلایا کہ رکشہ پبلک ٹرانسپورٹ میں شمار نہیں ہوتا بلکہ وہ ایک خصوصی اور مہنگی سواری ہے، جسے یومیہ سفر کرنے والے افراد برداشت نہیں کر سکتے۔
صحافی عمر قریشی نے اداکارہ کی ویڈیو کو شیئر کرتے ہوئے انہیں بتایا کہ رکشہ بہت سارے افراد کے لیے ’ایڈونچر‘ نہیں ہے اور نہ ہی یہ سستی سواری ہوتی ہے۔ انہوں نے لکھا کہ لاکھوں لوگوں کے پاس اپنی موٹر سائیکل، رکشہ یا کار نہیں ہیں اور نہ ہی وہ ایسی سواریوں کو برداشت کرنے کی وسعت رکھتے ہیں۔
اسی طرح ایک صارف نے ان کی ویڈیو شیئر کرتے ہوئے انہیں بتایا کہ جو لوگ باقائدہ طور پر یومیہ پبلک ٹرانسپورٹ استعمال کرتے ہیں، وہ جانتے ہیں کہ رکشہ سستی سواری نہیں ہے اور اس پر روزانہ سفر کرنا برداشت نہیں کر سکتے۔
اسی طرح بعض صارفین نے انہیں یاد دلایا کہ ان کی جانب سے رکشے کے سواری ایڈونچر ہوسکتی ہے لیکن بہت سارے غریب اس کا کرایہ برداشت نہیں کر سکتے۔
