اداکار گوہر رشید ‘لندن نہیں جاؤں گا’ کی کاسٹ میں شامل

پاکستان کے نامور ہدایت کار ندیم بیگ اس وقت اپنی فلم ‘لندن نہیں جاؤں گا’ پر کام کررہے ہیں جس کی کاسٹ میں اب ایک اور اداکار شامل ہوچکے ہیں۔
ذرائع کے مطابق اداکار گوہر رشید جو پہلے ہی رواں سال دو فلموں میں کام کرتے نظر آئیں گے جن میں ‘دی لیجنڈز آف مولا جٹ’ اور ‘منی بیک گارنٹی’ شامل ہیں، اب وہ ندیم بیگ کی فلم ‘لندن نہیں جاؤں گا’ کی کاسٹ کا بھی حصہ بن چکے ہیں۔ اس حوالے سے اداکار گوہر رشید نے انکشاف کیا کہ ‘میں اب اپنے کیریئر میں کامیڈی اداکاری کرنے کی بھی کوشش کررہا ہوں، فلم میں میرا کردار ہمایوں سعید کے کردار کا بہترین دوست بنے گا، میرے کردار کی کوشش ہوگی کہ جو بھی اس کا بہترین دوست کرنا چاہے وہ کام فوری ہوجائے’۔ اداکار کے مطابق ان کا کردار بولی وڈ فلم ‘منا بھائی ایم بی بی ایس’ میں موجود ‘سرکٹ’ کے کردار جیسا ہوگا۔
گوہر رشید نے مزید بتایا کہ ‘کبریٰ اور میں ایک دوسرے کے بہت اچھے دوست ہیں، ہم دونوں ایک ساتھ پہلی بار کام کرتے نظر آئیں گے اور ہم دونوں ہی بہت پرجوش بھی ہیں، یہ ایک ایسی فلم ہوگی جسے پوری فیملی ساتھ بیٹھ کر دیکھ سکے اور محظوظ ہو’۔ اداکار نے انکشاف کیا کہ فلم کی شوٹنگ کا آغاز رواں سال فروری میں ہوگا۔
واضح رہے کہ ‘لندن نہیں جاؤں گا’ کا اسکرپٹ خلیل الرحمٰن قمر نے تحریر کیا، اس فلم کی ہدایات ندیم بیگ دیں گے جبکہ پروڈکشن ہمایوں سعید کی کمپنی ‘سکس سگما’ کرے گی۔ فلم رواں سال عیدالضحیٰ کے موقع پر نمائش کے لیے پیش کی جائے گی۔