ارشد چائے والا دوبارہ خبروں میں کیوں آگیا؟

سوشل میڈیا کی اہمیت سے انکار آج کل کے دور میں ممکن نہیں ہے. یہ راتوں رات نہ صرف کسی بھی شخص کو شہرت کی بلندیوں تک پہنچا دیتا ہے بلکہ اسکی زندگی کو بھی بدل ڈالتا ہے، لوگوں کو یاد ہوگا کہ 2016 میں ایک فوٹوگرافر نے اسلام آباد کے اتوار بازار میں چائے بیچنے والے نوجوان ارشد خان کی ایک تصویر کھینچ کر سوشل میڈیا پر اپ لوڈ کی تھی جس نے وائرل ہوتے ہی ان کی قسمت بدل دی تھی اور ارشد خان چائے والا کے نام سے مشہور ہوگیا۔
بعد ازاں سوشل میڈیا سے شہرت حاصل کرنے والے ارشد خان کو شوبز انڈسٹری کی جانب سے ماڈلنگ اور ایکٹنگ کی آفرز بھی ہوئی تھیں۔ ارشد خان کا نام لندن کے جریدے کی جانب سے جاری کی جانے والی ایشیاء کے 50 پُرکشش ترین افراد کی فہرست میں بھی شامل کیا گیا تھا۔ اب کئی سال بعد ارشد خان ایک مرتبہ پھر سوشل میڈیا پر زیر بحث ہیں اور اس بار وہ اسلام آباد میں ایک ماڈرن طرز کا کیفے کھولنے کی وجہ سے سب کی توجہ حاصل کر رہے ہیں۔ ارشد خان نے حال ہی میں ایک انٹرویو دیا جس میں انہوں نے بتایا کہ انہوں نے اسلام آباد میں اپنا چائے کیفے کھولا ہے جس کا نام ’کیفے چائے والا‘ ہے۔ ارشد خان کے ماڈرن طرز کے کیفے کی تھیم ’ٹرک آرٹ‘ پر مبنی ہے اور اس میں شوخ رنگوں کا انتخاب کیا گیا ہے جب کہ کیفے کے انٹیرئیر ڈیزائن میں پاکستان کا کلچر صاف نمایاں ہے۔
ارشد نے کہا کہ میں فخر کرتا ہوں کہ میں چائے بناتا تھا، میرے دوست کیفے پر آتے ہیں تو وہ کہتے ہیں کہ اپنے ہاتھ سے چائے بناکر دو تو میں انکے لیے خود چائے بناتا رہتا ہوں۔ اپنے کیفے کے حوالے سے بات کرتے ہوئے ان کا کہنا تھا کہ کچھ لوگوں نے کہا کہ آپ نے کیفے کا نام چائے والا کیوں رکھا ہے اس کا نام صرف اپنے نام سے ارشد خان کردو تو میں انہیں کہتا ہوں کہ یہ میری پہچان ہے۔ ارشد خان نے بتایا کہ ان کے کیفے میں چائے کے علاوہ 15 سے 20 قسم کی کھانے کی اشیا بھی ہیں۔ انہوں نے کہا کہ میرے کیفے کا نام بھی میرے نام کے سے جڑا ہے اس لیے میں اسے زیادہ وقت دے رہا ہوں۔ ارشد خان نے بتایا کہ وہ آج کل اداکاری بھی کررہے ہیں اور ان کی ٹی وی شو کی کچھ اقساط نشر ہوچکی ہیں۔
انہوں نے کہا کہ ہمارے معاشرے میں اکثر لوگ کہتے ہیں کہ پڑھائی کرو، میں نے نہیں کی لیکن اللہ تعالیٰ نے مجھے اس مقام پر پہنچادیا۔ ارشد خان نے کہا کہ مجھے اس بات کا افسوس ہے کہ میں نے پڑھائی نہیں کی۔ انہوں نے بتایا کہ وہ ایک ایسا ادارہ بنانا چاہ رہا ہوں جہاں ان بچوں کو تعلیم دی جاسکی جن کے والدین تعلیم کے اخراجات برداشت کرسکیں۔ اس ادارے میں بچے ہنر بھی سیکھیں گے کہ انہوں نے بڑے ہو کر کیا کرنا ہے۔
خیال رہے کہ 2017 میں یہ خبریں بھی گردش کرتی رہیں کہ ارشد خان اپنے اداکاری کے کیریئر کو چھوڑ کر واپس چائے کے اسٹال پر جارہے ہیں، جس کی وجہ ان کے خاندان کی جانب سے لگائی جانے والی پابندیاں ہیں، ان قیاس آرائیوں کا آغاز اُس وقت ہوا جب ارشد خان کی گلوکارہ مسکان جے کے ساتھ ایک میوزک ویڈیو ریلیز ہوئی۔ رپورٹس تھیں کہ ارشد خان کے گھر والوں کو گلوکارہ کے ساتھ بنائی گئی ان کی یہ ویڈیو بالکل پسند نہیں آئی اور انہوں نے ارشد کے شوبز کیریئر کو ختم کرنے کا فیصلہ کرلیا ہے۔ تاہم ایک انٹرویو میں ارشد خان نے بتایاتھا کہ یہ خبریں جھوٹی اور بے بنیاد ہیں۔ بعدازاں گزشتہ برس انہوں نے ایک نجی ٹی وی کے پروگرام میں انکشاف کیا تھا وہ ایک بار پھر لوگوں کےلیے چائے بنانے کا کام کرنے لگے ہیں۔ انہوں نے بتایا تھا کہ وہ ماڈلنگ اور اداکاری کے کیرئیر کے باوجود چائے فروخت کرنے واپس آئے ہیں اور وہ اس کام کو کبھی نہیں چھوڑیں گے۔