بل گیٹس سے طلاق پر ملینڈا کو کتنی دولت ملے گی؟

طویل عرصے تک دنیا کے امیر ترین شخص کا اعزاز رکھنے والے مائیکروسافٹ کے بانی بل گیٹس جلد ہی امیر ترین افراد کی فہرست سے خارج ہو جائیں گے، کیوں کہ ان کی طلاق کے بعد بل گیٹس کو اپنے آدھے اثاثے یعنی تقریباً 73 ارب ڈالرز اپنے اہلیہ ملینڈا کے حوالے کرنا ہوں گے جس کے بعد ملینڈا دنیا کی دوسری امیر ترین خاتون بن سکتی ہیں۔ دوسری جانب ایسا ہو جانے کے بعد بل گیٹس ٹاپ ٹین امیر ترین لوگوں میں بھی جگہ نہیں بنا سکیں گے۔ یاد رہے کہ اس وقت بل گیٹس دنیا کے چوتھے امیر ترین شخص ہیں۔
خیال رہے کہ بل گیٹس اور ملینڈا نے 3 مئی 2021 کو 27 سال کی شادی کے بعد ایک دوسرے سے علیحدگی کا اعلان کیا تھا۔ واشنگٹن کی کنگ کاؤنٹی کی اعلیٰ عدالت میں دائر طلاق کی درخواست میں ملینڈا نے کہا تھا کہ بل گیٹس سے ان کی شادی ‘ناقابل تلافی حد تک ٹوٹ پھوٹ’ کا شکار ہے، جب کہ عدالت سے جوڑے کے 146 ارب ڈالرز کے اثاثے تقسیم کرنے کا مطالبہ بھی کیا گیا ہے۔ اب ان اثاثوں کی 50-50 فیصد تقسیم کا امکان ہے کیوں کہ میلنڈا کی طلاق کی درخواست میں یہ بھی انکشاف کیا گیا ہے کہ 1994 میں شادی کے بندھن میں بندھنے والے اس جوڑے نے شادی سے قبل مالی معاملات کا کوئی معاہدہ نہیں کیا تھا اور چونکہ واشنگٹن ریاست کے قانون کے تحت جوڑوں میں طلاق ہونے پر اثاثے مساوی بنیادوں پر دونوں میں تقسیم کردیئے جاتے ہیں اس لیے میلنڈا اب بل گیٹس کی آدھی جائیداد کی قانونی مالک بننے جا رہی ہیں۔
اگر ایسا ہوتا ہے تو ملینڈا دنیا کی دوسری امیر ترین خاتون بن جائیں گی۔ ان سے اوپر امیر ترین عورت 67 سالہ فرانسوئس بیتھنکورٹ میئرز ہوں گی جو L’Oreal کی مالک ہیں اور انکے 83 ارب ڈالرز کے اثاثے ہیں۔ بلومبرگ بلین ایئرانڈیکس کے مطابق بل گیٹس اس وقت 146 ارب ڈالرز کے ساتھ دنیا کے چوتھے امیرترین شخص ہیں۔ تاہم بل گیٹس دنیا کے امیر ترین شخص ہو سکتے تھے اگر وہ کم از کم 45 ارب ڈالرز بل اینڈ ملینڈا گیٹس فاؤنڈیشن کے ذریعے فلاحی کاموں کے لیے عطیہ نہ کردیتے۔
ان دونوں کی طلاق کی رپورٹس کے بعد یہ سوال بھی سامنے آیا ہے کہ بل گیٹس فاؤنڈیشن کے ذریعے جوڑے کے فلاحی اقدامات کا مستقبل کیا ہوگا۔ اس فاؤنڈیشن کو دیگر مخیر افراد سے بھی عطیات ملتے ہیں جن میں متعدد ارب پتی شخصیات کے ساتھ برطانوی حکومت بھی شامل ہے۔ اگرچہ بل اور ملینڈا کا کہنا ہے کہ وہ فاؤنڈیشن کی سربراہی جاری رکھیں گے مگر کچھ ماہرین کے مطابق طلاق کے بعد دونوں کے مختلف خیالات اس ادارے کی سمت پر اثرات مرتب کرسکتے ہیں۔ اس ادارے کے 1600 ملازمین ہیں جس کی جانب سے 135 ممالک میں مختلف جاری منصوبوں پر 50 ارب ڈالرز خرچ کیے جاچکے ہیں جب کہ فاونڈیشن کے اثاثوں کی مالیت 43 ارب ڈالرز ہیں۔
بل گیٹس اور ملینڈا گیٹس کے ذاتی اثاثوں میں 66 ہزار اسکوائر فٹ کا گھر بھی شامل ہے جس کی مالیت 13 کروڑ ڈالرز ہے۔ انکے متعدد ہالی ڈیے ہومز بھی ہیں، فلوریڈا میں 5 کروڑ 90 لاکھ ڈالر کا رینچ ہے جب کہ وومنگ میں 492 ایکڑ کا ایک رینچ بھی ہے۔ درحقیقت بل گیٹس امریکا کے زرعی زمینوں کے سب سے بڑے مالک ہیں۔ امریکہ کی 18 ریاستوں میں 2 لاکھ 42 لاکھ ایکڑ زمین ان کی ملکیت ہے جس کی مالیت 70 کروڑ ڈالرز بنتی ہے۔ یہ جوڑا کئی نجی طیاروں اور لاتعداد گاڑیوں کا مالک بھی ہے۔ ان کے سی ایٹل میں لیک واشنگٹن کے پاس موجود گھر کے گیراجوں میں 23 گاڑیاں کھڑی ہیں۔ ان کے اس گھر کو Xanadu 2.0 کے نام سے جانا جاتا ہے جب کہ پول ہاؤس میں 60 فٹ کا سوئمنگ پول بھی ہے جس میں ایک انڈر واٹر ساؤنڈ سسٹم جب کہ ٹیمپولین روم بھی موجود ہے۔ ریاست واشنگٹن کے کمیونٹی پراپرٹی قوانین کے تحت شادی کے دوران خریدی جانے والی جائیدادیں کسی بھی جوڑے کے درمیان مساوی بنیادوں پر تقسیم ہوں گی۔
یاد رہے کہ بل گیٹس اور ملینڈا گیٹس کی جانب سے عدالت میں باقاعدہ طلاق کے لیے اپریل 2022 میں پیش ہونے کا امکان ہے۔
خیال رہے کہ اس سے قبل ایمیزون کے بانی جیف بیزوز نے 25 سال کی شادی کے بعد میکنزی اسکاٹ سے 2019 میں علیحدگی اختیار کی تھی۔ یہ طلاق بھی واشنگٹن اسٹیٹ میں ہوئی تھی اور میکنزی اسکاٹ کو 38 ارب ڈالرز ملے تھے، ان کی دولت ذیادہ تر ایمیزون کے حصص پر مبنی تھی اور اب تک وہ 60 ارب ڈالرز کی مالک بن چکی ہیں۔
بل اور ملنڈا گیٹس کے تین بچے بھی ہیں، جن میں سے سب سے بڑی بیٹی جینیفر کیتھرائن گیٹس کی عمر 25 سال ہے جب کہ ان کے دو بیٹے بھی ہیں اور ان کی عمریں بھی 20 سال سے زائد ہیں۔