جلد الیکشن کا کوئی امکان نہیں، نواز، شہباز ملاقات میں اتفاق
وزیر اعظم شہباز شریف نے لندن میں مسلم لیگ ن کے قائد نواز شریف سے ملاقات کی ، جس میں اس بات پر اتفاق کیا گیا کہ ملک میں جلد الیکشن کا کوئی امکان نہیں ، انتخابات انتخابی اصلاحات کے بعد ہی ہونگے۔
وزیراعظم شہباز شریف نے وفاقی کابینہ کے اراکین کے ہمراہ نواز شریف سے اہم ملاقات کی ،جس میں ملک کی موجودہ سیاسی صورتحال سمیت اہم معاملات پر تبادلہ خیال کیا گیا۔
اس کے علاوہ شہباز شریف نے پارٹی قائد نواز شریف سے ون آن ون ملاقات بھی کی جس میں سابق وزیر خزانہ اسحاق ڈار، خواجہ سعد رفیق، ایاز صادق، مریم اورنگزیب سمیت دیگر رہنما بھی موجود تھے، ملاقات میں عام انتخابات کے حوالے سے بھی بات چیت ہوئی اور خاص طور پر پی ٹی آئی کی جانب سے جلد انتخابی مطالبے پر بھی تفصیلی تبادلہ خیال ہوا۔ملاقات کے دوران لیگی قائد نے سابق صدر آصف زرداری سے فون پر ہونے والی گفتگو سے وزیراعظم شہباز شریف کو آگاہ کیا۔
ن لیگی ذرائع کے مطابق وزیراعظم شہباز شریف اور نواز شریف کی ملاقات کے دوران اتفاق کیاگیا کہ ملک میں جلد انتخابات کا کوئی امکان نہیں،جنرل الیکشن انتخابی اصلاحات مکمل ہونے پر ہی ہونگے۔اس بات پر بھی اتفاق پایا گیا کہ
معیشت سے متعلق تمام جماعتوں کو اعتماد میں لیا جائے گا ۔اجلاس کے دوران نواز شریف نے عوام پر کم سے کم بوجھ ڈالنے کیلئے حکمت عملی تیار کرنے کی ہدایت کردی جبکہ ن لیگ کو عام انتخابات کیلئے تیاریوں کی ہدایت کر دی۔
