شہباز شریف ، حمزہ شہباز کی عبوری ضمانتوں میں 4 ستمبر تک توسیع

 لاہور کی بینکنگ عدالت نے ایف آئی اے کے مقدمے میں اپوزیشن لیڈر شہباز شریف اور حمزہ شہباز کی عبوری ضمانتوں میں 4 ستمبر تک توسیع کر دی جبکہ احتساب عدالت نے دونوں رہنماؤں کے خلاف نیب کے تین مختلف ریفرنسز میں کارروائی 16 ستمبر تک ملتوی کر دی۔

دوسری جانب احتساب عدالت میں شہباز فیملی کے خلاف آشیانہ اقبال، منی لانڈرنگ اور رمضان شوگر ملز ریفرنس پر سماعت ہوئی۔ جج کی عدم تعیناتی کے باعث ریفرنسز پر کوئی کارروائی نہ ہوسکی۔ عدالت نے آئندہ سماعت پر نیب کے گواہوں کو طلب کرتے ہوئے کارروائی 16 ستمبر تک ملتوی کر دی۔

شہباز شریف اور حمزہ شہباز کی پیشی کے موقع پر لیگی کارکن بڑی تعداد میں موجود تھے۔ کارکنوں نے شہباز شریف اور حمزہ شہباز کی گاڑیوں پر پھولوں کی پتیاں نچھاور کیں اور نعرے لگائے۔میڈیا سے گفتگو میں لیگی رہنما عطاء اللہ تارڑ نے حکومت کو ایک بار پھر تنقید کا نشانہ بنایا۔ انہوں نے کہا کہ حکومت کی جانب سے ہائیکورٹ کو خط لکھنا غیر آئینی عمل ہے، وفاقی حکومت کا خط کیسز پر اثرانداز ہونے کی کوشش ہے۔