محکمہ موسمیات نے ملک بھر میں بارشوں کی پیشگوئی کردی

محکمہ موسمیات کے مطابق ملک بھر میں بارشوں کا نیا سلسلہ شروع ہونے والا ہے جس کے بعد سردی کی شدت میں اضافہ کا امکان ہے۔ مغرب کی جانب سے آنے والا ہواؤں کا سلسلہ بالائی علاقوں میں داخل ہونے کے پنجاب کے مختلف علاقوں سمیت اسلام آباد، خیبرپختونخواہ، کشمیر اور گلگت بلتستان میں بارش کا امکان ہے۔
محکمہ موسمیات کا کہناہے کہ آج رات اورکل بالائی علاقوں میں گرج چمک کے ساتھ بارش کا امکان ہے۔ مغربی ہواؤں کے اس سلسلے کے باعث اسلام آباد، لاہور، شیخوپورہ، گجرات، سیالکوٹ، جہلم، میا نوالی، سرگودھا، خوشاب، مانسہرہ، ایبٹ آباد، پشاور، مردان، کوہاٹ، چارسدہ، سوات، دیر، چترال، کوہستان، گلگت بلتستان اور آزاد کشمیر میں بارش ہوگی۔
مزید بتایا گیا ہے کہ گرج چمک آندھی کے ساتھ بارش کے علاوہ ملک کے پہاڑی علاقوں پر برف باری کا امکان بھی ہے۔
بلوچستان کے بیشتر اضلاع میں موسم خشک جب کہ کوئٹہ، چمن، زیارت اور قلات میں سرد رہے گا۔ گزشتہ 24 گھنٹوں کے دوران ملک کے بیشتر علاقوں میں موسم خشک اور بالائی علاقوں میں سرد رہا۔ منگل کو ملک میں کم سے کم درجہ حرارت اسکردو، کالام منفی08، استور منفی 06، گوپس منفی 05، پاراچنار، ہنزہ، بگروٹ منفی 04، کوئٹہ منفی 03 اور مالم جبہ میں منفی 02 ڈگری سینٹی گریڈ ریکارڈ کیا گیا۔ واضح رہے کہ رواں برس ملک میں سردی کی شدت معمول سے زیادہ رہی تھی۔ تاہم گزشتہ کچھ روز سے موسم خشک رہنے کے باعث سردی کی شدت میں کمی آگئی تھی۔ تاہم اب پھر سے مغربی ہواوں کی آمد اور بارش کا سلسلہ شروع ہونے کے باعث ملک کے کئی علاقوں میں سردی کی شدت میں دوبارہ سے اضافہ ہو جانے کا امکان ہے۔