کابل جانیوالی پرواز سے بغیر دستاویزات سفر کرنیوالا گرفتار

ایف آئی اے نے کابل جانے والی خصوصی پرواز پر بغیر پاسپورٹ و سفری دستاویزات سفر کرنے کی کوشش کرنے والے شخص کو گرفتار کرلیا۔

ایکسپریس نیوز کے مطابق نیو اسلام آباد انٹرنیشنل ائیرپورٹ پر سیکورٹی کا بڑا سقم سامنے آیا ہے، ائیرپورٹ پر سیکورٹی سے متعلقہ اداروں میں اس وقت کھلبلی مچ گئی جب کابل میں پاکستانیوں اور غیرملکیوں کو نکالنے کے لیے جانے والے خصوصی طیارے کی روانگی سے قبل ایف آئی اے امیگریشن حکام نے طیارے میں فائنل چیکنگ کی، اس دوران پرواز میں سوار ایک ایسے شخص کو حراست میں لیا گیا جو بغیر پاسپورٹ اور دیگر سفری دستاویزات کابل جارہا تھا۔

گرفتار کئے گئے شخص کی شناخت نعمت الله کے نام سے ہپوئی ہے جو نیو اسلام آباد ایئرپورٹ میں سول ایوی ایشن کے سینی ٹیشن ڈیپارٹمنٹ میں ملازم ہے، ایف آئی اے نے نعمت اللہ کو حراست میں لے کر تحقیقات شروع کردی ہیں۔

دوسری جانب سیکیورٹی اداروں کی جانب سے اس بات کی بھی تحقیقات کی جارہی ہیں کہ سفری دستاویزات اور اجازت نامے کے بغیر کوئی شخص سیکورٹی زون کے اندر کھڑے طیارے میں کیسے پہنچ گیا۔