2022 میں 100 کروڑ کلب میں شامل ہونے والی بھارتی فلمیں
2022 میں جہاں بھارتی فلم انڈسٹری میں بڑے بجٹ سے بننے والی کئی فلمیں فلاپ ہوئیں وہیں ایسی فلمیں بھی ہیں جنہوں نے سو کروڑ روپے سے زائد کا بزنس کیا۔ سال کے آغاز میں فلم ’’آر آر آر‘‘ نے باکس آفس پر شاندار کمائی کی اور ہالی وڈ کے معتبر ترین ایوارڈ ’’گولڈن گلوب‘‘ کے لیے بھی نامزدگی حاصل کی۔
‘آر آر آر’ بالی وڈ کی سب سے زیادہ کمائی کرنے والی فلموں میں سے ایک ہے جس نے دنیا بھر سے 1100 کروڑ بھارتی روپے کمائے ہیں، فلم ‘آر آر آر’ 25 مارچ 2022 کو سنیما گھروں کی زینت بنی تھی، فلم میں اداکار رام چرن، جے آر این ٹی آر، عالیہ بھٹ، اجے دیوگن سمیت دیگر نے اداکاری کے جوہر دکھائے ہیں۔
ایسی ہی ایک اور فلم دریشم ٹو بھی ہے، اجے دیوگن کی سپر ہٹ فلم ‘دریشم’ کے سیکوئل کا ان کے چاہنے والوں کو بے صبری سے انتظار تھا، اسلیے نومبر میں دریشم کا سیکوئل آیا تو اس نے باکس آفس پر شاندار بزنس کیا۔ ’’دریشم ٹو‘‘ اب تک 298 کروڑ بھارتی روپے کما چکی ہے جبکہ ابھی اس کی نمائش جاری ہے۔
مشہور بالی وڈ فلم ‘بھول بھلیاں’ کا سیکوئل ‘بھول بھلیاں ٹو’ بھی اپنے پہلے پارٹ کی طرح ہی ہٹ ہوا، کارتک آریان، کیارا اڈوانی اور تبو کی فلم ‘بھول بھلیاں ٹو’ مئی میں ریلیز ہوئی تھی، یہ فلم 2022 کی کامیاب ترین فلم سمجھی جاتی ہے، ’’بھول بھلیاں ٹو‘‘ نے ایک ماہ میں 260 کروڑ سے زائد بھارتی روپے کمائے تھے۔ بالی وڈ اداکار رنبیر کپور اور عالیہ بھٹ کی فلم ‘براہماستر’ ستمبر 2022 میں سنیما گھروں کی زینت بنی تھی، فلم کی ہدایات ایان مکھرجی نے دی تھیں جب کہ اسے کرن جوہر کی ’’دھرما پروڈکشنز‘‘ کے بینر تلے ریلیز کیا گیا تھا، فلم نے اوپننگ ویک پر دنیا بھر سے 225 کروڑ بھارتی روپے کا کاروبار کیا تھا۔
سنجے لیلا بھنسالی کی فلم ‘گنگو بائی کاٹھیاواڑی’ فروری 2022 میں سنیما گھروں کی زینت بنی، جس میں اداکارہ عالیہ بھٹ کے ساتھ اجے دیوگن نے بھی اداکاری کے جوہر دکھائے ہیں، فلم نے باکس آفس پر 125 کروڑ بھارتی روپے کا بزنس کیا تھا۔
رواں برس مارچ میں فلم ‘دی کشمیر فائلز’ ریلیز ہوئی جس کی کہانی 80 کی دہائی میں کشمیر میں ہندو پنڈتوں کی مبینہ ٹارگٹ کلنگ اور نقل مکانی کے گرد گھومتی ہے، فلم کی ہدایات وویک اگنی ہوتری نے دی تھیں جس میں اداکار انوپم کھیر سمیت دیگر نے اداکاری کی، یہ فلم بھی 2022 کی کامیاب فلموں میں سے ایک ہے جس نے باکس آفس پر 200 کروڑ بھارتی روپے کا بزنس کیا۔
ایکشن اور ڈرامہ فلم کے جی ایف کے چیپٹر ٹو نے باکس آفس پر کھڑکی توڑ بزنس کیا۔اس فلم میں اداکار سنجے دت اور روینہ ٹنڈن سمیت دیگر نے اداکاری کے جوہر دکھائے تھے۔’کے جی ایف ٹو’ نے دنیا بھر سے تقریباً 1200 کروڑ بھارتی روپے کا بزنس کیا تھا۔
ایکشن اور سنسنی خیز تامل فلم وکرم جون 2022 میں ریلیز ہوئی جس کی ہدایات لوکیش کناگراج نے دی تھیں، اس فلم نے دنیا بھر سے تقریباً 300 کروڑ بھارتی روپے کمائے تھے۔ ’’وکرم‘‘ میں اداکار کمال حسن، فہد فاصل سمیت دیگر نے اداکاری کی تھی۔ ساؤتھ انڈین فلم ‘کنتارا’ کی ہدایات رشبھ شیٹی نے دی تھیں جب کہ یہ 30 ستمبر کو سنیما گھروں کی زینت بنی، فلم کے کاروبار کا جائزہ کرنے والے تجزیہ کار ترن آدرش کے مطابق کنڑ زبان کی اس فلم نے دنیا بھر سے 400 کروڑ بھارتی روپے کمائے ہیں۔
