حکومت نے الیکشن کمیشن آف پاکستان کی جانب سےآنیوالے فیصلے کے بعد تحریک انصاف کیخلاف پولیٹیکل پارٹیز آرڈر 2002 کے تحت کارروائی کا فیصلہ کیا ہے۔

وزیر اعظم شہباز شریف کی زیر صدارت ہونے والے وفاقی کابینہ کے اجلاس کے بعد میڈیا سے گفتگو کرتے وزیر اطلاعات مریم اورنگزیب نے کہا کہ کابینہ نے تحریک انصاف کیخلاف پولیٹیکل پارٹیز آرڈر 2002 کے تحت کارروائی کا فیصلہ کیا ہے، پولیٹیکل پارٹی آرڈر 2002 کے آرٹیکل 2، 6 ،15 اور17 کے تحت کارروائی کی جائے گی، جلد ڈیکلریشن تیار کرکے سپریم کورٹ بھیجا جائے گا ، جبکہ ممنوعہ فنڈنگ کیس کی مزید تحقیقات ایف آئی اے سے کرانے کا فیصلہ کرلیا گیا۔ ایف آئی اے دیگر اداروں کی خدمات بھی لے سکے گا ،پی ٹی آئی قیادت کا نام ای سی ایل میں ڈالنے کی منظور نہیں دی کیوں ای سی ایل میں نام ڈالنے کا معاملہ کابینہ کے ایجنڈے میں نہیں تھا۔

انہوں نے کہا الیکشن کمیشن نے فارن فنڈنگ کیس کا فیصلہ سنایا، اکبرایس بابر اپنی پٹیشن لیکر الیکشن کمیشن گئے تھے، اس پیٹیشن سے مسلم لیگ ن کا کوئی تعلق نہیں تھا، 8سال بعد الیکشن کمیشن نے تفصیلی فیصلہ دیا، فیصلے کے بعد وزارت قانون کی طرف سے کابینہ کومفصل بریفنگ دی گئی۔

انکا کہناتھا الیکشن کمیشن کے فیصلے میں تحریک انصاف فارن ایڈڈ پارٹی ڈکلیئرہوئی ہے، تحریک انصاف غیرملکی امداد لینے والی جماعت قرار پائی ہے، اب حکومت پاکستان ڈکلیئریشن بھیجنے کی پابند ہیں، سپریم کورٹ میں ڈکلیئریشن بھیجنے کا اصولی فیصلہ کرلیا گیا ہے۔ ڈکلیئریشن کو فوری تیار کر کے سپریم کورٹ بھجوایا جائے گا، وزارت قانون تمام آئینی وقانونی چیزوں کا جائزہ لیکر ڈکلیئریشن کابینہ کو پیش کرے گی۔

مریم اورنگزیب نے کہا یہ سیاسی حریف نہیں قانون وآئین کا معاملہ ہے، سولہ اکاؤنٹس کو ڈکلیئرنہیں کیا گیا، عمران خان سمیت سنیئرقیادت کے نام پر کھلے تھے، عمران خان کے ملازمین کے نام پر پیسے آتے رہے اور ڈکلیئر نہیں کیا گیا، فیصلے کے مطابق اب تحریک انصاف غیر ملکی امداد لینے والی سیاسی جماعت ڈکلیئر ہو گئی ہے، عمران خان نے الیکشن کمیشن میں اپنا بیان حلفی دیا، عمران خان نے 5 دفعہ بیان حلفی اپنے دستخطوں کے ساتھ جمع کرایا، کابینہ نے وزارت داخلہ کو غیرجانبدار انکوائری کرانے کا کہا ہے، خیرات کے پیسے کوسیاسی مقاصد کے لیے استعمال کیا گیا۔ ایف آئی اے کوفوری انکوائرئ شروع کرنے کی ہدایت دی گئی ہے۔

وزیر اطلاعات کے مطابق کابینہ کے فیصلے کے بعد انکوائری شروع کر دی گئی ہے، ایسی انکوائری ہو گی جو الیکشن کمیشن کے فیصلے کی روشنی میں کرے گی، فیصلے کے بعد تاریخ میں پہلی دفعہ کسی سیاسی جماعت کوغیر ملکی امداد لینے والی جماعت قراردیا گیا، تحریک انصاف نے 8سالوں میں 75 مرتبہ التوا لیا تھا، یہ حکومت تھوڑی عمران کی حکومت سے مختلف ہے، یہ فیصلہ عمران کی حکومت میں آیا ہوتا توسب اس وقت جیل میں ہوتے، ہم نے دو چیزوں کا فیصلہ کیا ہے، ایک ڈکلیئریشن، دوسرا انکوائری ہو گی، غیر ملکی امداد لینا اورچھپانا بہت بڑا جرم ہے، 4 ملازمین کے ذاتی اکاؤنٹس میں فارن فنڈنگ آتی رہی، وزارت قانون کوسپریم کورٹ میں ڈکلیئریشن بھیجنے کے حوالے سے تین دن دیئے گئے۔

عدالتی حکم کے باجود گورنر پنجاب حمزہ شہباز سے حلف لینے سے انکاری

مریم اورنگزیب نے بتایا کہ کابینہ اجلاس کے دوران این ڈی ایم اے کے تمام انتظامات کوبھی سراہا گیا، این ڈی ایم اے صوبائی حکومت کے ساتھ مل کر نقصانات کا تخمینہ لگانے کا کہا گیا ہے، تباہ ہونے والے مکانات کی بحالی کے لیے 5،5 لاکھ روپے دیئے جارہے ہیں، وزیراعظم نے جاں بحق افراد کے لواحقین کو10لاکھ روپے فی کس دینے کی ہدایت کی۔