ناقدین میرا جو اکھاڑ سکتے ہیں اکھاڑ لیں، مجھے فرق نہیں پڑتا
معروف اداکارہ حرا مانی نے اپنی پرفارمنس پر تنقید کرنے والے ناقدین کو مردانہ سٹائل میں جواب دیتے ہوئے کہا ہے کہ انہوں نے میرا جو اکھاڑنا ہے اکھاڑ لیں، مجھے کوئی فرق نہیں پڑنے والا۔ حرا مانی کے فین پیج پر ایک مختصر ویڈیو شیئر کی گئی ہے جسے پہلے ان کے شوہر مانی نے انسٹا گرام سٹوری میں شیئر کیا، اس ویڈیو میں دونوں نے حرا کی جانب سے لندن میں 14 اگست کی ایک تقریب کے دوران ڈانس پر تنقید کرنے والوں کو مزاحیہ انداز میں کرارا جواب دیا۔ ویڈیو میں دونوں ائیر پورٹ پر بیٹھے دکھائی دیتے ہیں، جس میں حرا اور مانی نے تنقید کرنے والوں کو کہا کہ وہ انکا کچھ نہیں بگاڑ سکتے، کیونکہ وہ اس وقت ان سے کافی دور لندن میں بیٹھے ہوئے ہیں۔ اسی دوران حرا مانی کہتی سنائی دیتی ہیں کہ تم لوگوں نے میرا جو ’’اُکھاڑنا ہے، اکھاڑ لو‘‘۔
لیکن اسکے بعد حرا مانی نے مداحوں سے محبت کا اظہار بھی کیا اور کہا کہ انہیں تمام تر تنقید کرنے کے باوجود اپنے مداحوں سے محبت ہے، حرا مانی پر تنقید کا آغاز تب ہوا جب انہوں نے لندن میں 14 اگست کو یوم آزادی کے ایک فنکشن میں حصہ لیتے ہوئے ڈانس کیا جس میں انہیں بولڈ لباس میں دیکھا گیا۔
ویڈیو میں حرا مانی اپنے 2019 کے مقبول ڈرامے ’’دو بول‘‘ کے گانے ’’جا تجھے معاف کیا‘‘ کو گاتی دکھائی دیتی ہیں اور شائقین کو بھی گانا گانے کا کہتی ہیں مگر ان کے بار بار کہنے کے باوجود کوئی ان کے ساتھ گانا نہیں گاتا۔
اداکارہ کے ساتھ شائقین کی جانب سے گانا نہ گنگنانے کی ویڈیو وائرل ہوتے ہی لوگوں نے ان پر تنقید شروع کر دی اور انہیں صرف اداکاری ہی کرنے کا مشورہ ملنا شروع ہو گیا۔ زیادہ تر ناقدین نے کہا کہ گلوکاری حرا کے بس کی بات نہیں، لوگوں کی تنقید کے بعد اب اداکارہ نے شوہر کے ہمراہ ایک ویڈیو شیئر کرتے ہوئے تنقید کرنے والوں سے کہا ہے کہ وہ ان کا جو اکھاڑ سکتے ہیں اکھاڑ لیں، انہیں فرق نہیں پڑتا۔ یاد رہے کہ حرا مانی کو لندن میں ایوارڈز کی ایک تقریب میں بہترین اداکارہ کا ایوارڈ بھی دیا گیا تھا، انسٹا گرام پر حرا مانی کے فین کی جانب سے بنائے گئے پیجز پر اسی تقریب میں اداکارہ کی جانب سے کی گئی پرفارمنسز کی مختلف ویڈیو شیئر کی گئی ہیں، جن میں انہیں مختلف پاکستانی گانوں پر پرفارمنس کرتے ہوئے دیکھا جا سکتا ہے۔ حرا مانی نے اس تقریب میں ’’پسوڑی‘‘، ’’بجلی بھری ہے انگ انگ میں‘‘ اور ’’جا تجھے معاف کیا‘‘ سمیت کئی گانوں پر پرفارمنس کی تھی۔
