شوبز شخصیات کا ساتھی اداکاراؤں سے یکجہتی کا اظہار
ایک عمرانڈو فوجی افسر کی جانب سے چار ٹاپ پاکستانی اداکاراؤں پر دو جرنیلوں سے جنسی تعلقات کا الزام لگائے جانے کے بعد شوبز شخصیات اپنی ساتھی اداکارائوں کی حمایت میں سامنے آ گئی ہیں، اور فنکاروں کیخلاف مہم کی شدید الفاظ میں مذمت کی ہے۔ یاد رہے کہ عمران خان کے حمایتی میجر ریٹائرڈ عادل راجہ نے ایک ویڈیو میں کہا تھا کہ پاکستان کی چار ٹاپ اداکارائوں کو افسران اور سیاستدانوں کے لیے استعمال کیا جاتا رہا ہے، یوٹیوبر نے دعویٰ کیا کہ اداکاراؤں کو جب سیاستدانوں کے لیے استعمال کیا جاتا تھا تو تب ان کی نامناسب ویڈیوز بنائی جاتی تھیں، انہوں نے کسی اداکارہ یا ماڈل کا واضح نام لیے بغیر ان کے ناموں کے ابتدائی انگریزی حروف بتائے تھے۔ اداکاراؤں پر الزامات کے بعد کبریٰ خان، سجل علی، مہوش حیات اور ماہرہ خان نے انہیں کرارا جواب دیا تھا اور ان کے خلاف قانونی چارہ جوئی کا اعلان کیا تھا۔ اب کئی شوبز شخصیات بھی ان اداکاراؤں کی حمایت میں سامنے آ گئی ہیں اور انہوں نے ریٹائرڈ میجر کی جانب سے چلائی گئی گندی مہم کی شدید مذمت کی ہے۔ اداکارہ انوشے اشرف نے اپنی لمبی چوڑی انسٹا گرام پوسٹ میں عادل راجا کی جانب سے لگائے گئے الزامات کو جھوٹ کا پلندہ قرار دیتے ہوئے اپنی ساتھی اداکاراؤں کی کردار کشی کی شدید مذمت کی۔
انہوں نے لکھا کہ چونکہ اداکارائیں مشہور ہوتی ہیں اور ان کا نام لینے سے ہی ہیڈ لائنز بن جاتی ہیں اس لیے راجہ جیسے شہدے کردار ایکٹریسز کو آسان ہدف سمجھ کر ان کی کردار کشی کرتے ہیں، انہوں نے لکھا کہ ہمارے سماج میں جس بندے نے کچھ بھی نہیں پڑھا ہوتا اور اسے کسی چیز کا کوئی علم تک نہیں ہوتا، وہ بھی خواتین کے لباس اور کام پر رائے دیتا ہے، اپنی پوسٹ کے کیپشن میں انوشے نے ان پانچ فیصد مرد حضرات کا شکریہ بھی ادا کیا جو خواتین کا ساتھ دیتے ہیں، انہوں نے ایسے مرد حضرات کو ہی سچا مرد قرار دیا۔
اسی طرح اداکارہ زارا نور عباس نے بھی اداکاراؤں پر الزامات لگانے کی مہم کی مذمت کی اور لکھا کہ اظہار کی آزادی کا یہ مطلب ہرگز نہیں کہ کوئی بھی کبھی بھی اُٹھ کر کسی خاتون پر الزام لگا دے، انہوں نے اپنی پوسٹ میں لکھا کہ اداکارہ ہونے کا مطلب یہ نہیں ہے کہ وہ جھوٹے الزامات پر خاموش رہیں گی۔ اسکے علاوہ سابق3 فوجی افسر ہونے کا بھی ہرگز یہ مطلب نہیں کہ آپ منہ اٹھا کر جسے چاہیں اسے بدنام کرتے پھریں۔ زارا نور عباس نے لکھا کہ خواتین یا مرد حضرات پر شواہد کے بغیر الزامات لگانے والے افراد کا احتساب ہونا چاہئے، اداکارہ منشا پاشا نے بھی کسی نام لکھے بغیر لکھا کہ خواتین اگرچہ طاقتور اور مضبوط بھی ہوتی ہیں تو بھی ان پر ایک عام آدمی الزامات لگا سکتا ہے اور انہیں بدنام کرتا ہے۔ انہوں نے خواتین پر الزامات لگانے کے عمل کو بزدلانہ قرار دیا، فیشن ڈیزائنر ماہین خان نے بھی عادل راجا کی جانب سے اداکاراؤں پر الزامات لگانے کی مذمت کرتے ہوئے لکھا کہ خواتین کی بدنامی ہمیشہ سے آسان رہی ہے اور میڈیا بھی انہی کا احتساب کرتا دکھائی دیتا ہے۔
زارا نور نے لکھا کہ اداکاراؤں پر حالیہ حملہ عورت سے نفرت کے علاوہ کچھ بھی نہیں، انہوں نے سوال کیا کہ کیا ایسا نہیں ہوسکتا کہ ہم خواتین کو عزت کی نگاہ سے دیکھیں، نجم سیٹھی کی بیٹی اداکارہ میرا سیٹھی نے بھی اپنی انسٹاگرام سٹوری میں اداکاراؤں سے اظہار یکجہتی کرتے ہوئے ان کی بہادری کو سراہا اور لکھا کہ ایسے بیہودہ الزامات پر آواز بلند کرنے والی اداکارائیں بہادر ہیں۔ اداکار منیب بٹ نے بھی انسٹاگرام سٹوری شیئر کرتے ہوئے عادل راجا کے الزامات کو 1990 کی گندی سیاست کا تسلسل قرار دیا، اداکار نے ساتھی اداکاراؤں سے اظہار یکجہتی کرتے ہوئے لکھا کہ وہ کمزور نہیں ہیں اور وہ ہر مشکل میں ان کے ساتھ کھڑے رہیں گے۔
