ایران نے حملے سے قبل قطر کو آگاہ کیا تھا، امریکی میڈیا کا دعویٰ

امریکی اخبار نیویارک ٹائمز نے دعویٰ کیا ہے کہ ایران نے قطر میں امریکی العدید ایئر بیس پر حملے سے قبل قطری حکام کو پیشگی اطلاع دی تھی۔

رپورٹ کے مطابق ایران کا مقصد ممکنہ جانی نقصان سے بچاؤ تھا، اسی لیے حملے سے قبل قطر کو آگاہ کیا گیا تاکہ سکیورٹی اقدامات کیے جا سکیں۔ امریکی میڈیا کے مطابق اس بات کا علم سابق ٹرمپ انتظامیہ کو بھی حملے سے پہلے ہو چکا تھا۔

ایرانی حملوں کے حوالے سے فی الحال ایرانی حکومت کی جانب سے اس دعوے پر کوئی باضابطہ ردعمل سامنے نہیں آیا۔

واضح رہے کہ ایران نے حال ہی میں قطر اور عراق میں امریکی فوجی اڈوں پر بیلسٹک میزائل داغے۔ امریکی ذرائع ابلاغ کے مطابق ایران نے قطر کی جانب 6 بیلسٹک میزائل فائر کیے، جن میں سے ایک کو قطری فضائی دفاعی نظام نے فضا میں ہی تباہ کر دیا۔

قطری وزارت خارجہ کا کہنا ہے کہ حملے سے قبل پیشگی احتیاطی تدابیر کے طور پر العدید ایئر بیس کو خالی کرا لیا گیا تھا۔ قطر نے اس حملے کی شدید مذمت کرتے ہوئے کہا ہے کہ وہ اپنے دفاع کا حق محفوظ رکھتا ہے۔ خوش قسمتی سے حملے میں کوئی جانی نقصان نہیں ہوا۔

یاد رہے کہ قطر میں واقع امریکی العدید ایئر بیس مشرقِ وسطیٰ میں امریکا کا سب سے بڑا فوجی اڈہ تصور کیا جاتا ہے۔