کیا ایمن خان کو شوہر منیب بٹ نے شو بز سے دور کیا ہے
اداکارہ ایمن خان کی سکرین سے دوری پر یہ افواہیں گرم تھیں کہ ان کے شوہر اداکار منیب بٹ نے انہیں شوبز کی دنیا میں مذید کام کرنے سے روک دیا ہے۔ تاہم اب منیب نے کہا ہے کہ یہ بات جھوٹ ہے اور میں نے کبھی سکرین پر کام نے کرنے کے لیے ایمن پر کوئی دبائو نہیں ڈالا۔
یاد رہے کہ ایمن اور منیب کی جوڑی کو شوبز حلقوں میں بہت سراہا جاتا ہے لیکن شادی کے بعد ایمن خان کو ماضی کے مقابلے میں سکرین پر کم دیکھا جا رہا ہے۔ شادی کے بعد جلد ہی بیٹی کی پیدائش کی وجہ سے ممکنہ طور پر ایمن خان سکرین سے کچھ دور ہیں لیکن یہ چہ مگوئیاں شروع ہو گئیں کہ انہیں شوہر نے کام سے روک رکھا ہے۔
تاہم اب منیب بٹ نے ایک انٹرویو میں واضح کیا ہے کہ انہوں نے اہلیہ کو کام کرنے سے نہیں روکا اور نہ ہی اس حوالے سے ان کا بیوی پر کوئی دباؤ ہے بلکہ سکرین سے دوری کا فیصلہ خود ایمن خان کا اپنا ہے۔ منیب بٹ نے بتایا کہ میں نے آج تک انہوں نے بیوی سے نہ کبھی یہ کہا ہے کہ وہ کام کریں اور نہ ہی یہ کہا کہ وہ کام نہ کریں بلکہ وہ اہلیہ کے ہر فیصلے کی حمایت کرتے ہیں، منیب بٹ کے مطابق بطور شوہر ان کی ذمہ داری ہے کہ وہ اہلیہ کی بات مانیں اور باہمی رضا مندی کے ساتھ چلیں مگر یہ بھی سچ ہے کہ وہ اہلیہ پر کسی طرح کا کوئی دباؤ نہیں رکھتے۔
اداکار نے شکوہ کیا کہ ایمن خان کے اپنے فیصلوں کی وجہ سے لوگ انہیں ولن سمجھ رہے ہیں۔ منیب نے اپنی خواہر نسبتی منال خان کی حال ہی میں ہونے والی شادی پر بھی بات کی اور کہا کہ لوگ منال اور احسن محسن کا موازنہ ان سے اور ایمن خان سے کرتے ہیں جو کہ درست نہیں۔ منیب بٹ نے برہمی کا اظہار کرتے ہوئے کہا کہ پاکستان میں ہر تین میں سے ایک شخص کی عادت ہوتی ہے کہ وہ دوسروں کے گھروں اور معاملات میں دخل اندازی کر کے آگ لگائے۔
منیب بٹ نے ڈراموں میں مرد حضرات کو کم مواقع یا کم کردار دیئے جانے کے معاملے پر بھی بات کی اور کہا کہ اس میں کسی حد تک سچائی ہے کہ ڈراموں میں مرد حضرات کے کردار کم ہوتے ہیں یا انہیں اہم کردار نہیں دیئے جاتے۔اداکار نے دلیل دی کہ چونکہ ڈرامے زیادہ تر خواتین دیکھتی ہیں، اس لیے ان میں خواتین کے کردار زیادہ ہوتے ہیں اور ان ہی کے کردار اہم بھی ہوتے ہیں۔
