آصف زرداری مدد کی آفر کرنیوالے اسٹیبلشمنٹ کے بندے کا نام بتائیں

پیپلزپارٹی کے شریک چیئرمین آصف زرداری سے عسکری ذرائع نے مطالبہ کیا ہے کہ وہ اسٹیبلشمنٹ کے اس بندے کا نام بتائیں جس نے آصف زرداری سے رابطہ کر کے ان سے مدد کی درخواست کی تھی۔
عسکری ذرائع نے پیپلزپارٹی کے شریک چیئرمین کے بیان پر شدید افسوس کا اظہار کرتے ہوئے کہا کہ ہر مرتبہ غیر ذمہ داری کا ثبوت دے کر اسٹیبلشمنٹ کیساتھ ڈیل کے بیان جاری کیے جاتے ہیں جوکہ بدقسمتی ہے۔سابق صدر کے بیان پر جس عسکری شخصیت نے ردعمل دیا وہ اعلیٰ عہدے پر فائز ہے۔
ان کا کہنا تھا کہ عسکری عہدیداران کو عجیب اور بے بنیاد بیانات دینے والے ایسے سیاستدانوں کیساتھ کسی بھی غیر ضروری بحث میں نہیں پڑنا چاہئے۔ انہوں نے کہا کہ اسٹیبلشمنٹ پر الزام عائد کرنے کا یہ سلسلہ اب بند ہونا چاہئے۔
خیال رہے کہ چند روز قبل سابق صدر آصف علی زرداری نے دعویٰ کیا تھا کہ مائنس ون کے فارمولے والے مستقبل کے سیاسی سیٹ اپ کیلئے اب ہم سے مدد مانگ رہے ہیں۔
آصف علی زرداری کا کہنا تھا کہ مجھ سے مدد مانگ کر نیا فارمولہ پوچھا گیا ہے، لیکن میں نے انہیں واضح کر دیا ہے کہ پہلے اس حکومت کو گھر بھیجا جائے، اس کے بعد ہم سے بات کی جائے۔