سینیٹ الیکشن کیلئےاپوزیشن نہیں سلیکٹڈ عوامی پیسہ استعمال کر رہا ہے

پیپلز پارٹی کے چیئرمین بلاول بھٹو نے الزام عائد کیا ہے کہ وزیراعظم اراکین اسمبلی کو خریدنے کیلئے ریاست کا پیسہ استعمال کر رہے ہیں۔ عمران خان نے ہر ایم این اے کو پچاس، پچاس کروڑ دیئے۔
اسلام آباد میں پی ڈی ایم کے متفقہ امیدوار یوسف رضا گیلانی کے ہمراہ میڈیا سے بات چیت میں انہوں نے کہا کہ پی ٹی آئی والے کھل کر کہہ رہے ہیں ان کو ووٹ نہیں دیں گے۔ سینیٹ الیکشن کیلئے ہماری تیاری مکمل ہے، سب کو خوشخبری دیں گے۔بلاول بھٹو نے الزام عائد کیا کہ وزیراعظم عمران خان ممبران کو خریدنے کے لیے ریاست کا پیسہ استعمال کر رہے ہیں لیکن ہم ہر ممبر پر زور دے رہے ہیں کہ وہ ضمیر کے مطابق اپنا ووٹ دے۔
چیئرمین پیپلز پارٹی نے کہا کہ سینیٹ میں پیسے کے استعمال کی بات کرکے اپوزیشن کی کردار کشی کی جا رہی ہے۔ پیسہ حکومت استعمال کر رہی ہے۔انہوں نے دعویٰ کیا کہ پی ڈی ایم کی جدوجہد کی وجہ سے عمران خان پہلی بار پریشان ہے کہ ان کی حکومت جا رہی ہے۔ان کا کہنا تھا کہ تین سال سے حکومت عوامی مسائل حل نہیں کر سکی۔ پی ڈی ایم جدوجہد میں آج سے ہی کامیاب ہو گئی، کل جو ہوگا وہ بونس ہوگا۔ ہمارا مقصد پارلیمنٹ کی بالا دستی ہے۔
دوسری طرف سینیٹ الیکشن میں پی ڈی ایم کے متفقہ امیدوار یوسف رضا گیلانی نے اپنے صاحبزادے کی ویڈیو پر ردعمل دیتے ہوئے کہا ہے کہ میڈٰیا پر اسے بھونڈے طریقے سے چلایا جا رہا ہے۔اسلام آباد میں پارٹی چیئرمین بلاول بھٹو کے ہمراہ میڈٰیا سے گفتگو میں انہوں نے کہا کہ حکومت کو کس سے خوف ہے؟ یہ تو اپنے ہی لوگوں پر شک کر رہے ہیں۔
یوسف رضا گیلانی کا کہنا تھا کہ ووٹ مانگنا ہمارا حق ہے، یہ اپنے ممبران کو سنبھالیں۔ میں نے تو ووٹ کے لیے وزیراعظم کو بھی خط لکھا ہے۔ ہم پارلیمنٹ کی بالا دستی چاہتے ہیں۔ وزیراعظم پہلے کسی سے ہاتھ نہیں ملاتے تھے لیکن آج ملاقاتیں کر رہے ہیں۔ان کا کہنا تھا کہ سینیٹ الیکشن کے بارے میں سپریم کورٹ کی رائے کے بعد وزرا نے اپنی اپنی رائے دینا شروع کر دی ہے۔ تمام الیکشن خفیہ بیلٹ سے ہوتے ہیں۔ ترامیم کرنا پڑے گی، ہم ہارس ٹریڈنگ کے خلاف ہیں۔