پشاور، بورڈ بازار میں مبینہ خودکش دھماکا، 2 افراد جاں بحق

پشاور کے علاقے بورڈ بازار میں دھماکے کے نتیجے میں 2 افراد جاں بحق اور ایک شخص زخمی ہوگیا۔

پولیس کے مطابق زخمی اور لاشوں کو اسپتال منتقل کردیا گیا ہے جب کہ زخمی شخص کی حالت بھی تشویشناک بتائی جارہی ہے۔

ایس ایس پی آپریشنز کاشف آفتاب عباسی کے مطابق مبینہ طور پر خودکش دھماکا ہوا ہے۔

ایس ایس پی کے مطابق دھماکا ناصر باغ میں موٹر سائیکل پر بارودی مواد سے آج صبح کیا گیا،شواہد اکٹھے کیے جارہے ہیں۔

پولیس کی بھاری نفری جائے وقوعہ کی طرف روانہ کردی گئی ہے۔

میڈیا سے بات کرتے ہوئے ایس ایس پی نے کہا کہ دھماکے میں 4 سے 5 کلو بارودی مواد استعمال ہوا،  دھماکا خودکش تھا یا نہیں، ابھی نہیں کہہ سکتے،تفتیش جاری ہے۔

کاشف آفتاب کے مطابق بارودی مواد ایک جگہ سے دوسری جگہ لے جایا جا رہا تھا کہ راستے میں ہی دھماکا ہوا۔