خدا پر کامل یقین رکھنے والوں کا شاہکار ڈرامہ ’’قلندر‘‘ تیار

خدا پر کامل ایمان رکھنے والوں کیلئے شاہکار ڈرامہ سیریز ’’قلندر‘‘ جلد ریلیز ہونے والی ہے جس میں منیب بٹ اور کومل میر مرکزی کردار کرتے دکھائی دیں گے، منیب بٹ نے انسٹاگرام پر ڈرامے کا پوسٹر شیئر کیا اور لکھا کہ عقائد اور اقدار کی خوبصورت کہانی دیکھیں بہت جلد جیو پر۔ منیب بٹ نے ڈرامے کے حوالے سے بتایا کہ انہوں نے ’’قلندر‘‘ میں ایک ایسے لڑکے کا کردار ادا کیا ہے جو خوش مزاج اور زندہ دل ہونے کے ساتھ اپنے خوابوں کو پورا کرنے پر یقین رکھتا ہے اور وہ چاہتا ہے کہ ایک کامیاب بزنس مین بن جائے۔
اداکار کے مطابق ڈرامے میں ان کی فیملی کا تعلق پنجاب کے دیہی علاقے کے متوسط گھرانے سے ہے جس نے اپنی جمع پونجی سے لڑکے کو لاہور میں پڑھنے کے لیے بھیجا ہوتا ہے۔ دوسری جانب لڑکے کا خواب ہوتا ہے کہ وہ اپنے گھر والوں کو پر آسائش زندگی دے۔

اداکار منیب بٹ نے ڈرامے کی ہیروئن کا تعارف کرواتے ہوئے بتایا کہ یہ کہانی ایک ایسی لڑکی کے گرد گھومتی ہے جوکہ بہت مذہبی ہے اور اسے اس بات پر یقین ہے کہ وہ خدا سے جو بھی دعا مانگے گی وہ مانی جائے گی۔ کیونکہ وہ بہت دعائیں مانگتی ہے، اس لیے اس کی دعائوں میں بہت اثر بھی ہوتا ہے، لڑکی کا کردار ڈرامے میں منیب بٹ کی کزن کا ہے، جس سے شادی کے لیے ان کے والد اس کا ہاتھ مانگتے ہیں، منیب نے ڈرامے کی مزید کہانی بتانے سے گریز کرتے ہوئے کہا کہ وہ اس سے زیادہ کچھ نہیں بتا سکتے، کیونکہ یوں فلم کا مزہ خراب ہو جائے گا۔
منیب بٹ نے بتایا کہ یہ کہانی تین سے چار کرداروں کے گرد گھومتی ہے اور اس میں بتایا گیا ہے کہ جو لوگ خدا پر یقین رکھتے ہیں اور دوسروں کو نقصان نہیں پہنچاتے، اللہ تعالی ان کا بھی نقصان نہیں ہونے دیتا ہے۔ فلم کی تھیم کے مطابق شروع میں مشکلات ہو سکتی ہیں لیکن آخر میں سب اچھا ہوتا ہے۔ ڈرامے میں اپنے کردار بارے منیب بٹ نے بتایا کہ انکا کیریکٹر لوگوں کو یہ پیغام دے گا کہ اگر آپ دولت کے پیچھے بھاگیں گے اور اپنے فیصلے اس کی بنیاد پر لیں گے تو بالآخر آپ ناکام ہوں گے۔
لہٰذا آپ زندگی میں جب بھی کوئی فیصلہ لیں تو دولت کے بجائے اپنے رشتوں کو فوقیت دیں۔ اداکار نے ڈرامے میں کومل میر کے ساتھ اداکاری کے تجربے کو بہترین قرار دیا اور کہا کہ کومل کے ساتھ اداکاری کرتے ہوئے مجھے بالکل بھی ایسا محسوس نہیں ہوا کہ میں ان کے ساتھ پہلی بار کام کر رہا ہوں، مجھے اُمید ہے کہ لوگوں کو بھی ہماری جوڑی پسند آئے گی کیونکہ دیکھنے والے آن اسکرین نئے چہروں کو پسند کر رہے ہیں۔
منیب بٹ نے بتایا کہ اس ڈرامے کی لکھاری ثمرہ بخاری ہیں جو اس سے پہلے ’گھر تتلی کا پر’ اور ’گل رعنا‘ لکھ چکی ہیں جبکہ اس کی ہدایات صائمہ وسیم نے دی ہیں جو ’’کہیں دیپ جلے‘‘ کو ڈائریکٹ کرچکی ہیں اور اس کے پروڈیوسر عبداللہ کادوانی ہیں۔ ’’قلندر‘‘ کی دیگر کاسٹ میں علی عباس، اسما عباس، کا شف محمود، نور الحسن، علی طاہر، کنزہ ملک، حمنا عامر، ماہم افضل ، عثمان چوہدری، نائمہ خان ،کنزہ رزاق، صادون علی اور فجر خان شامل ہیں۔