اجمیر شریف حاضری کے خواہشمند افراد سے درخواستیں طلب

 وزارت مذہبی امور نے اجمیر شریف بھارت جانے کے لیے زائرین سے درخواستیں طلب کی ہیں۔ وزارت کی جانب سے جاری اطلاع عام میں کہا گیا کہ خواجہ معین الدین چشتی رحمتہ اللہ علیہ کے عرس میں شرکت کے خواہشمند اپنی درخواستیں 30 اگست تک جمع کرواسکتے ہیں۔ہند کے مشہور بزرگ کا سالانہ عرس 3 اور 4 فروری کو اجمیر شریف بھارت میں ہوگا۔

درخواستوں کی قرعہ اندازی یکم اکتوبر کو منعقد ہوگی اور اس میں صرف ان زائرین کی درخواستیں شامل کی جائیں گی جن کی کووڈ ویکسینیشن مکمل ہوچکی ہے۔حالیہ بین الاقوامی انتظامات کے مطابق زائرین کو روانگی سے 48 گھنٹوں پہلے کے دوران کروائے گئے پی سی آر ٹیسٹ کی رپورٹ فراہم کرنی ہوگی۔ وزارت نے زائرین کو آگاہ کیا کہ کووِڈ 19 کے اسٹینڈرڈ آپریٹنگ پروسیجر کی روشنی میں عوامی اجتماعات پر پابندی ہے۔لہٰذا اس سلسلے میں حتمی فیصلہ حکومت پاکستان زیارت کے موقع پر دونوں ممالک میں کورونا وائرس کی صورتحال کو مدِ نظررکھتے ہوئے کرے گی۔

زیارت کے خواہشمند افراد وزارت مذہبی امور کی ویب سائٹ سے درخواست فارم ڈاؤن لوڈ کرسکتے ہیں۔خیال رہے کہ سال 2019 میں مقبوضہ کشمیر میں پلوامہ واقعے کے بعد پاکستان اور بھارت کے مابین تعلقات سخت کشیدہ ہوگئے تھے جس کے بعد دونوں ممالک کے سوائے چند صورتوں کے ہر قسم کی زمینی اور فضائی آمدو رفت معطل ہوگئی تھی۔انہیں حالات کے پیشِ نظر بھارت نے سال 2019 میں اجمیر شریف حاضری کے لیے پاکستانی زائرین کو ویزے جاری کرنے سے انکار کردیا تھا تاہم پاکستان کی جانب سے کرتاپور دربار اور دیگر مقدس مقامات کی یاترا کے لیے آنے والے بھارتی شہریوں کو اجازت دینے کا سلسلہ جاری تھا۔