آصف زرداری پر فردِ جرم کی کارروائی 3 مارچ تک موخر

احتساب عدالت نے منی لانڈرنگ اور پارک لین ریفرنس کیس میں سابق صدرآصف زرداری اور اور ان کی ہمشیرہ فریال تالپور کے خلاف فرد جرم کی کارروائی 3 مارچ تک مؤخر کردی ہے۔ آصف زرداری علالت کے باعث احتساب عدالت پیش نہ ہو سکے جبکہ ان کی جانب سے حاضری سے استثنیٰ کی درخواست پیش کی گئی۔
احتساب عدالت کے جج اعظم خان نے سابق صدرآصف زرداری اور فریال تالپور کے خلاف میگامنی لانڈرنگ، جعلی بینک اکاؤنٹس کیس کی سماعت کی۔ فریال تالپور سمیت دیگر ملزمان نےعدالت میں حاضریاں لگوائیں جبکہ آصف زرداری پیش نہ ہوئے۔ سماعت کے دوران احتساب عدالت کے جج اعظم خان نے استفسار کیا کہ خواجہ انور مجید کہاں ہیں؟ جس پر نیب پراسیکیوٹر کا کہنا تھا کہ انور مجید کو کراچی سے لانے کے لیے نیب ہیڈ کوارٹرز کو خط لکھا ہے۔
نیب پراسیکیوٹر کا مزید کہنا تھا کہ نیب تمام کیسزمیں پلی بارگین کی رقم سے متعلق تفصیلات اکٹھی کر رہا ہے۔
سماعت کے دوران وکیل آصف زرداری فاروق ایچ نائیک نے عدالت سے کہا کہ ہمیں ابھی تک ریفرنس کی کاپیاں فراہم نہیں کی گئیں ہیں اور اپیل کی کہ عدالت ریفرنسزکی کاپیاں فراہم کرنے کی ہدایت دے۔
جج احتساب عدالت کی جانب سے تمام ملزمان کوریفرنس کی کاپیاں فراہم کرنے کی ہدایت کرتے ہوئے کیس کی سماعت 3مارچ تک ملتوی کردی گئی۔