حکومت نے عمران کیخلاف توہین عدالت کی درخواست دائرکر دی
حکومت نے تحریک انصاف کے چیئرمین اور سابق وزیر اعظم عمران خان کے خلاف سپریم کورٹ میں توہین عدالت کی درخواست دائر کر دی۔
وزارت داخلہ کی جانب سے عمران خان کے خلاف توہین عدالت کی درخواست احتجاج اور لانگ مارچ کے معاملے پر دائر کی گئی ہے۔
عدالت عظمیٰ میں دائر درخواست میں وفاقی حکومت نے مؤقف اختیار کیا ہے کہ عمران خان اسلام آباد کی جانب لانگ مارچ اور احتجاج کے اعلانات کر رہے ہیں، عمران خان سپریم کورٹ احکامات کی خلاف ورزی کر رہے ہیں۔
دائر درخواست میں کہا گیا ہے کہ سپریم کورٹ نے عمران خان کو پر امن احتجاج کی اجازت دی تھی لیکن عمران خان ایک مرتبہ پھر اسلام آباد پر چڑھائی کے اعلانات کر رہے ہیں۔
حکومت کی جانب سے دائر درخواست میں سے استدعا کی گئی ہے کہ سپریم کورٹ عمران خان کو احتجاج اور دھرنے کے حوالےسے اپنے احکامات پر عملدرآمد یقینی بنانے کا حکم دے۔
واضح رہے کہ چیئرمین تحریک انصاف عمران خان نے اسلام آباد کی جانب لانگ مارچ کا اعلان کر رکھا ہے تاہم ان کی جانب سے لانگ مارچ کی تاریخ کا تاحال اعلان نہیں کیا گیا۔
