گیلانی کو کلین چٹ، بیٹے علی حیدر کیخلاف مقدمہ کا حکم

الیکشن کمیشن نے تحریک انصاف کی جانب سے سینیٹر یوسف رضا گیلانی کی نااہلی کے لیے پاکستان تحریک انصاف کی درخواست خارج کر دی ہے، جبکہ ان کے بیٹے ایم پی اے علی حیدر گیلانی پر کرپٹ پریکٹس کا مقدمہ درج کرنے کا حکم دے دیا ہے۔

ای سی پی نے سینیٹ الیکشن ویڈیو سکینڈل میں سینیٹر یوسف رضا گیلانی اور ان کے بیٹے ایم پی اے علی حیدر گیلانی کے خلاف کیس کی سماعت کی، پاکستان تحریک انصاف نے یوسف رضا گیلانی اور ایم پی اے علی حیدر گیلانی کی نااہلی کی درخواست کی۔

ای سی پی نے یوسف گیلانی کیخلاف درخواستوں کو خارج کردیا، چیف الیکشن کمشنر نے کہا کہ اس کیس کے حقائق ٹھیک پیش نہیں کیے گئے، یوسف رضا گیلانی کیخلاف براہ راست کوئی شواہد نہیں، وہ سینیٹر رہیں گے۔

ڈسٹرکٹ الیکشن کمشنر کو سیکشن 168، 167 کے تحت علی حیدر گیلانی اور پی ٹی آئی اراکین اسمبلی کیپٹن ریٹائرڈ جمیل اور فہیم خان کیخلاف فوجداری مقدمہ درج کرانے کا حکم دیا۔ کرپٹ پریکٹس کی سزا تین سال قید، ایک لاکھ جرمانہ یا دونوں ہو سکتے ہیں۔

محسن بیگ کیخلاف مقدمہ خارج کرنے کا فیصلہ چیلنج

یاد رہے کہ پاکستان تحریک اںصاف کے فرخ حبیب، ملیکہ بخاری، کنول شوذب اور عالیہ حمزہ نے یوسف گیلانی اور بیٹے کی نااہلی کی درخواستیں دائر کی تھیں۔