واٹس ایپ سکرین شاٹ لینے کا فیچر ختم کرنے کا فیصلہ

میٹا کمپنی کی اپیلیکیشن واٹس ایپ نے صارفین کو میسجز کے سکرین شاٹس لینے سے روکنے کے لیے نیا فیچر متعارف کروانے کا فیصلہ کیا ہے، واٹس ایپ کا یہ نیا فیچر صارفین کو ’ویو ونس‘ والے میسجز کے سکرین شاٹس لینے سے روکے گا۔
واٹس ایپ صارفین جب کوئی تصویر یا ویڈیو کسی کو بھیجتے ہیں تو موبائل ایپ ان کو یہ آپشن دیتی ہے کہ اگر وہ چاہیں تو وہ پیغام موصول کرنے والے کو تصویر یا ویڈیو کو ایک سے زائد بار دیکھنے سے روک سکتے ہیں، تاہم موجودہ حالت میں واٹس ایپ ’ویو ونس‘ میسجز کا سکرین شاٹ لیا جاسکتا ہے۔
واٹس ایپ اس کے ساتھ ایسے فیچرز متعارف کروانے کا ارادہ بھی رکھتا ہے جس سے صارفین کوئی بھی چیٹ گروپ دیگر لوگوں پتہ لگے بغیر چھوڑ پائیں گے، یہ نئے فیچرز پہلے مرحلے رواں ماہ برطانیہ میں متعارف کروائے جائیں گے۔ دو ہفتے قبل اس حوالے سے بات کرتے ہوئے میٹا کے چیف ایگزیکٹو مارک زکربرگ نے کہا تھا کہ ہم اپنے پیغامات کے تحفظ کے لیے نئے طریقے ڈھونڈتے رہیں گے اور ان پیغامات کو بالکل اس طرح سے پرائیویٹ بنایا جائے گا جیسے آپ کسی سے سامنے بات کررہے ہوں، اس کے علاوہ واٹس ایپ ایک ایسا فیچر متعارف کروانے کا ارادہ بھی رکھتا ہے جس سے صارفین اپنا آن لائن سٹیٹس کنٹرول کر سکیں گے اور ان کو اختیار حاصل ہوگا کہ وہ کس کو اپنا آن لائن سٹیٹس دکھانا چاہتے ہیں اور کن صارفین کو نہیں۔
یاد رہے کہ حال ہی میں واٹس ایپ نے ایک اور فیچر بھی متعارف کروایا ہے جس کے ذریعے صارفین کے لیے اپنا بھیجا ہوا میسج ڈیلیٹ کرنے کا دورانیہ بڑھا دیا گیا ہے، اب صارفین 60 گھنٹوں کے اندر ہی اپنا بھیجا ہوا میسج ڈیلیٹ کر سکیں گے، میٹا کی ذیلی کمپنی میں میسج ڈیلیٹ کرنے کا فیچر 2017 میں متعارف کرایا گیا تھا لیکن اس کو ڈیلیٹ کرنے کے لیے صرف 1 گھنٹہ اور 8 منٹ کا وقت میسر تھا۔ واٹس ایپ کی جانب سے یہ قدم رواں برس ایپل کے آئی میسج ایپ میں اس ہی طرح کی تبدیلیاں متعارف کرانے کے بعد اٹھایا گیا ہے۔
آئی فون صارفین، جن کو اپنی میسجنگ ایپ سے بھیجا گیا میسج ڈیلیٹ کرنے کے لیے 15 منٹ میسر ہوتے ہیں، کی جانب سے واٹس ایپ میں کی گئی ان تبدیلوں کو خوش آمدید کہا جا رہا ہے، واٹس ایپ کا ٹوئٹر پیغام میں کہنا تھا ’میسج بھیجتے ہوئے بار بار سوچتے ہیں؟ اب آپ کے پاس اپنے بھیجے گئے میسج کو ڈیلیٹ کرنے کے لیے دو دن سے تھوڑا زیادہ وقت میسر ہوگا۔‘
تاہم، میسج ڈیلیٹ کرنے کے طریقہ کار میں کوئی تبدیلی نہیں کی گئی ہے۔ جس طرح پہلے میسج ڈیلیٹ ہونے کے بعد یہ نوٹی فیکیشن ’یہ میسج ڈیلیٹ کردیا گیا ہے لکھا آتا تھا، وہ بھی ویسے ہی لکھا آئے گا۔