ٹوئیٹر صارف کو شازیہ منظور پر طنز کیسے بھگتنا پڑا؟

امریکہ میں آواز کا جادو جگانے میں مصروف معروف پاکستانی گلوکارہ شازیہ منظور پر طنز کرنا ایک ٹوئٹر صارف کو مہنگا پڑ گیا۔ شازیہ نے لمبرگنی گاڑی سے اترنے کی اپنی ویڈیو سوشل میڈیا پر شیئر کی تو اسد انکل نامی اوورسیز ٹوئٹر صارف اس پر طنز کا اظہار کر کے پھنس گئے۔
گلوکارہ شازیہ منظور کی سوشل میڈیا پر شیئر کی گئی ویڈیو میں دیکھا جا سکتا ہے کہ وہ لال رنگ کی چمچماتی ہوئی لمبرگنی گاڑی سے اتر رہی ہیں اور انڈین پنجابی بینڈ ’دا دوربین‘ اور راگینی ٹنڈن کا مشہور گانا ’لمبرگنی چلائی جاندے او‘ گا رہی ہیں۔ امریکہ کے شہر ہیوسٹن میں بنائی گئی یہ 14 سیکنڈ کی ویڈیو شازیہ منظور نے اپنے ٹک ٹاک اکاؤنٹ سے پوسٹ کی تھی۔
ٹوئٹر صارف ’اسد انکل‘نے شازیہ منظور کی ویڈیو ری ٹویٹ کی اور لکھا کہ ’ذرا سوچیں کہ آپ شادی پر رخصتی کروانے کی کوشش کر رہے ہیں اور جیسے ہی باہر نکلتے ہیں تو دیکھتے ہیں کہ کوئی آنٹی آپ کی کار کے ساتھ یہ کچھ کر رہی ہیں۔
اس ٹویٹ کا صاف مطلب یہ تھا کہ ’اسد انکل‘ شازیہ کو پہچانتے نہیں تھے، بس پھر کیا تھا، پاکستانی ٹوئٹر صارفین نے انہیں آڑے ہاتھوں لے لیا۔
دعا سید نامی ٹوئٹر صارف نے ’اسد انکل‘ کے الفاظ کو ’شرمندگی آمیز‘ ٹویٹ قرار دیا اور ساتھ یہ بھی کہا کہ اگر شازیہ میری رخصتی پر آتی ہیں تو میں رخصتی کا انتظار کر سکتی ہوں۔ حسین خان نامی صارف نے لکھا کہ شازیہ منظور کو رینڈم آنٹی کہنا سمندر پار پاکستانیوں سے ووٹ کا حق واپس لینے کے لیے کافی ہے۔ تیمور زمان نامی صارف تو اتنے غصے میں آ گئے کہ انہوں نے اسد انکل نامی صارف کا اکاؤنٹ ہی معطل کرنے کا مطالبہ کر دیا۔ ایک ٹویٹ میں انہوں نے لکھا کہ شازیہ منظور صاحبہ کو کوئی آنٹی کہنے پر آپ معطل ہونے کے مستحق ہیں۔
’2000 کی دہائی میں شاہ رخ خان اور ہریتھک روشن پر فلمایا گیا گانا جس پر آج بھی سارے انڈینز اور زیادہ تر پاکستانی پاگل ہیں وہ شازیہ میڈم کے گانوں سے کاپی ہوئے ہیں۔
ٹوئٹر پر اتنی سخت ٹرولنگ ہونے کے بعد ’اسد انکل‘ نے صارفین سے معافی مانگنے میں ہی عافیت جانی۔ ایک ٹویٹ میں اسد انکل نے کہا کہ میں پاکستانی ٹوئٹر صارفین سے شازیہ منظور کو نہ جاننے پر معافی مانگتا ہوں۔ اس غلطی کے ازالے کے لیے میں اور میری بیوی بار بار شازیہ کے گانے سنیں گے، میں آپ کے پاس واپس تب آؤں گا جب مجھے ان کے گانے دل سے یاد ہوں گے۔ یاد رہے کہ شازیہ منظور نے اپنے لمبے کیریئر میں بیشمار مشہور گانے گائے جس میں ’چن میرے مکھنا‘، ’بتیاں بجھائی رکھ دی ‘ اور ’تو بدل گیا سجنا‘ شامل ہیں۔