پولیس ٹریننگ اسکول کے پرنسپل ایس ایس پی ابرار نیکوکارہ نے خودکشی کرلی

راولپنڈی پولیس کے مطابق روات پولیس ٹریننگ اسکول کے پرنسپل ایس ایس پی ابرار حسین نیکوکارہ نے خود کو گولی مار کر اپنی زندگی کا خاتمہ کرلیا۔ سی پی او راولپنڈی نے بتایا کہ خودکشی کا نوٹ بھی ان کی لاش کے پاس سے ملا ہے، جائے وقوعہ سے شواہد جمع کرلیے گئے ہیں۔ ایس ایس پی ابرار حسین ڈپریشن کا شکار اور ماہر نفسیات کے زیر علاج تھے۔
پولیس کے مطابق ایس ایس پی ابرار حسین نیکوکارہ نے پیرکی شام سوا 6 بجے کے قریب پی ٹی ایس روات میں اپنے کمرے میں خود کو گولی مار کر خودکشی کرلی۔ وہ پولیس ٹریننگ اسکول کے احاطہ میں واقع سرکاری رہائش گاہ میں بیوی اور دو بچوں کے ہمراہ رہائش پذیر تھے۔
ایس ایس پی کی خودکشی کی اطلاع ملنے پر آر پی او راولپنڈی اور سی پی او سمیت دیگر سینئر پولیس افسران پولیس ٹریننگ اسکول روات پہنچ گئے جب کہ راولپنڈی پولیس نے بھی ابرار حسین نیکو کارہ کی خودکشی کی تصدیق کردی ہے۔
سی پی او راولپنڈی کے مطابق بظاہر خودکشی فائر آرم کے ذریعہ کی گئی ہے، تاہم پوسٹ مارٹم کے بعد مزید تفصیلات سامنے آ سکیں گی۔ ابرار حسین نیکوکارہ خودکشی سے قبل حسب معمول اپنے دفتر گئے تھے اور کام بھی کیا تھا۔ پولیس ٹریننگ اسکول میں گزشتہ ہفتے پاسنگ آؤٹ پریڈ ہوئی تھی اور ان دنوں چھٹیاں تھیں۔ بعض اطلاعات کے مطابق ابرار حسین نیکوکارہ گھریلو جھگڑوں کی وجہ سے پریشان تھے۔
خود کشی کا نوٹ بھی جاۓ وقوعہ سے ملا ہے، ایس ایس پی نے اپنی آخری تحریر میں لکھا کہ انسان خود کشی تب کرتا ہے جب وہ بیزار ہو جاتا ہے۔ انہوں نے والدہ اور اہلیہ سے معافی مانگتے ہوئے کہا کہ کوئی شخص ان کی موت کا ذمہ دار نہیں ہے۔
میاں ابرار حسین نیکوکارہ چنیوٹ کے نواحی علاقہ ہرسہ شیخاں کے رہنے والے تھے، انہوں نے 18 جنوری 2019 کو پی ٹی ایس روات کے پرنسپل کا چارج لیا اور تقریباً ایک سال سے وہ اس عہدے پر خدمات سرانجام دے رہے تھے۔
ایس ایس پی میاں ابرار حسین سی ٹی او فیصل آباداور ڈی پی او خوشاب بھی تعینات رہے۔