کالعدم تحریک طالبان کا جنگ بندی ختم کرنے کا اعلان

ٹی ٹی پی جنگ بندی ختم کرنے کا اعلان کرتے ہوئے حکومت کے ساتھ ایک ماہ تک جاری رہنے والے معاہدے کی توسیع سے انکار کر دیا ہے ، اس اعلان سے امن کی ابتدائی کوششوں کو دھچکا لگا۔

کالعدم تحریک طالبان کے بیان میں 6 نکاتی معاہدے کی تفصیلات بتائی گئی ہیں جس میں کہا گیا کہ ان کا 25 اکتوبر 2021 کو ’اسلامی اماارت افغانستان (آئی ای اے) کی حمایت سے حکومت کے ساتھ سمجھوتہ ہوا۔

فریقین نے قبول کیا تھا کہ آئی ای اے ثالث کا کردار ادا کریگی ، دونوں فریق پانچ رکنی کمیٹیاں تشکیل دیں گے جو ثالث کی نگرانی میں آئندہ کے لائحہ عمل تیار کرے گی۔

فریقین نے یکم نومبر سے 30 نومبر 2021 تک ایک ماہ کی جنگ بندی، حکومت کی جانب سے 102 ’قیدی مجاہدین‘ کی رہائی ، انہیں اسلامی امارات افغانستان کے ذریعے ٹی ٹی پی کے حوالے کرنے اور یکم نومبر 2021 کو جنگ بندی کے حوالے سے مشترکہ بیان دینے پر اتفاق کیا۔

حکومت فریقین کے درمیان طے شدہ فیصلوں پر عمل درآمد کرانے میں ناکام رہی بلکہ اس کے بجائے سیکیورٹی فورسز نے ڈیرہ اسمٰعیل خان، لکی مروت، سوات، باجوڑ، صوابی اور شمالی وزیرستان میں چھاپے مار کر عسکریت پسندوں کو ہلاک کیا۔
یہ بھی پڑھیں:بپن راوت کے ہیلی کاپٹر کا کاک پٹ وائس ریکارڈر مل گیا

ٹی ٹی پی کا جنگ بندی ختم کرنے کا فیصلہ کئی دہائیوں سے ریاست کے خلاف جنگ لڑنے والے عسکریت پسندوں کے ساتھ امن معاہدہ کرنے کی حکومتی کوششوں کے لیے ایک بڑا دھچکا ہے۔