چین اورپاک افغان وزرائے خارجہ کاسی پیک کوتوسیع دینے پر اتفاق

چین اورپاک افغان وزرائے خارجہ نےسی پیک کو افغانستان تک توسیع دینے پر اتفاق کرلیا۔

پاکستان، چین اور افغانستان کے وزرائے خارجہ کا چھٹا سہ فریقی ڈائیلاگ کابل میں ہوئے۔

دفترخارجہ کے مطابق سہ فریقی اجلاس میں سیاسی،اقتصادی اورسکیورٹی تعاون پربات چیت ہوئی اور تینوں ممالک نے دہشتگردی کےخلاف مشترکہ کوششیں تیزکرنے کا عزم کیا۔

ترجمان نے بتایاکہ سہ فریقی اجلاس میں تجارت، ٹرانزٹ، علاقائی ترقی، صحت، تعلیم اور ثقافتی تعاون بڑھانے پراتفاق کیا گیا۔

دفترخارجہ کے مطابق اجلاس میں سی پیک کو افغانستان تک توسیع دینے پر بھی اتفاق کیا گیا۔

دوسری جانب افغان وزیرخارجہ نے پاکستانی وزیرخارجہ اسحاق ڈار کو یقین دہانی کرائی ہے کہ دہشت گردوں کا مل کر مقابلہ کریں گے،افغان سرزمین کسی دہشت گردگروہ کو پاکستان کیخلاف استعمال کرنےکی اجازت نہیں دیں گے۔

ترجمان دفتر خارجہ کے مطابق پاکستان کے نائب وزیراعظم و وزیر خارجہ نے کابل میں سہ فریقی وزرائے خارجہ اجلاس کے موقع پر افغانستان کے قائم مقام وزیر خارجہ مولوی امیر خان متقی سے ملاقات کی۔

ملاقات میں دونوں وزرائے خارجہ نے پاک افغان تعلقات میں مثبت پیش رفت پر اطمینان کا اظہار کیا اور سفارتی تعلقات کو ناظم الامور سے بڑھا کر سفیر کے درجے تک لے جانے کے فیصلے کا خیرمقدم کیا، جو 21 مئی 2025 کو بیجنگ میں سہ فریقی اجلاس کے دوران طے پایا تھا۔

فریقین نے 19 اپریل اور 17 جولائی کو نائب وزیراعظم کے کابل کے دوروں اور 21 مئی کے بیجنگ اجلاس کا حوالہ دیتے ہوئے اس بات پر اطمینان ظاہر کیا کہ بیشتر فیصلوں پر عملدرآمد مکمل یا تکمیل کے قریب ہے، جس سے خصوصاً تجارت اور ٹرانزٹ کے شعبوں میں نمایاں بہتری آئی ہے۔

نائب وزیراعظم و وزیر خارجہ نے سیاسی و تجارتی تعلقات میں پیش رفت کو سراہا تاہم زور دیا کہ قومی سلامتی اور انسدادِ دہشتگردی کے شعبوں میں مزید اقدامات کی ضرورت ہے۔ انہوں نے پاکستان میں حالیہ دہشتگرد حملوں کا حوالہ دیتے ہوئے افغان حکام سے مطالبہ کیا کہ تحریک طالبان پاکستان (ٹی ٹی پی) اور بلوچستان لبریشن آرمی (بی ایل اے) مجید بریگیڈ جیسے گروہوں کے خلاف ٹھوس اور قابلِ تصدیق کارروائی کی جائے۔

اس موقع پر افغان قائم مقام وزیر خارجہ نے یقین دہانی کرائی کہ افغان سرزمین پاکستان یا کسی دوسرے ملک کے خلاف استعمال نہیں ہونے دی جائے گی۔

آخر میں نائب وزیراعظم و وزیر خارجہ نے افغان قیادت کی مہمان نوازی پر شکریہ ادا کیا اور سہ فریقی مذاکرات کے کامیاب انعقاد پر مبارکباد پیش کی۔