ڈی چوک احتجاج کیس : علیمہ خان کو گرفتار کرکے پیش کرنے کا حکم

ڈی چوک احتجاج کیس میں عدم پیشی پر انسداد دہشت گردی عدالت نے علیمہ خان کو گرفتار کر کے پیش کرنے کا حکم جاری کردیا۔

26 نومبر ڈی چوک احتجاج کیس میں تھانہ صادق آباد میں درج انسداد دہشت گردی عدالت کے جج امجد علی شاہ نے علیمہ خان کے ناقابل ضمانت وارنٹ گرفتاری جاری کردیے۔

ڈی چوک احتجاج کیس میں آج علیمہ خان پر فرد جرم عائد ہونا تھی،تاہم علیمہ خان عدالت میں پیش نہیں ہوئیں،جس پر عدالت نے حاضری معافی کی درخواست مسترد کر دی اور وارنٹ گرفتاری جاری کرتےہوئے علیمہ خان کو گرفتار کر کے کل بدھ 15 اکتوبر کو عدالت میں پیش کرنے کا حکم دیا۔

انسداد دہشت گردی عدالت کے جج امجد علی شاہ نے نے ریمارکس دیے کہ طلبی کے باوجود بار بار پیش نہ ہونا عدالتی امور میں رکاوٹ ڈالنا ہوتا ہے۔عدالت نے ناقابل ضمانت وارنٹ گرفتاری کے آرڈرز فوری تفتیشی آفیسر کو فراہم کرنے کا حکم دیا۔

پولیس ذرائع کے مطابق ناقابل ضمانت وارنٹ گرفتاری کے ساتھ پولیس ٹیم اڈیالہ جیل جائےگی۔علیمہ خان توشہ خانہ ٹو کیس کی سماعت کےلیے اڈیالہ جیل پہنچ رہی ہیں۔جیل سماعت کےبعد علیمہ خان کی گرفتاری یا وارنٹ گرفتاری کی تعمیل کرائی جائےگی۔