وزیراعظم نےغیراعلانیہ لوڈشیڈنگ کانوٹس لےلیا

وزیراعظم محمد شہباز شریف نے ملک کے مختلف علاقوں میں بجلی کی بڑھتی ہوئی لوڈشیڈنگ کا سخت نوٹس لیتے ہوئے حکام کو واضح ہدایت کی ہے کہ کسی بھی علاقے میں 2 گھنٹے سے زیادہ بجلی بند نہ کی جائے۔

اسلام آباد میں بجلی کی لوڈ مینجمنٹ پر ایک اہم جائزہ اجلاس کی صدارت کرتے ہوئے وزیراعظم نے موجودہ صورتحال پر شدید برہمی کا اظہار کیا۔

انہوں نے متعلقہ اداروں پر زور دیا کہ عوام کو ریلیف فراہم کرنے کے لیے تمام دستیاب وسائل کا مؤثر استعمال یقینی بنایا جائے۔

اجلاس کے دوران بریفنگ میں بتایا گیا کہ خطے کی حالیہ کشیدہ صورتحال اور آبنائے ہرمز میں پیدا ہونے والی ترسیلی مشکلات کے باعث پاکستان کو آر ایل این جی کی فراہمی متاثر ہوئی ہے۔

گیس کی اس قلت سے بجلی کی پیداوار میں کمی آئی، جس کے باعث طلب اور رسد کا توازن برقرار رکھنے کے لیے حکام کو مجبوراَ لوڈ مینجمنٹ کا سہارا لینا پڑ رہا ہے۔

اس پر وزیراعظم نے متعلقہ حکام کو ہدایت کی کہ مستقبل کی ضروریات کو مدنظر رکھتے ہوئے آر ایل این جی کی ترسیل کے تعطل سے نمٹنے کے لیے فوری اور ہنگامی اقدامات کیے جائیں تاکہ عوام کو بلا تعطل بجلی فراہم کی جا سکے۔