صنعتوں اور کسانوں کو رعایتی نرخوں پر بجلی فراہم کی جائے گی : وزیر اعظم
وزیر اعظم شہباز شریف نے صنعتوں اور کسانوں کےلیے بجلی کے شعبے میں بڑا ریلیف پیکج متعارف کرا دیا ہے،جس کا مقصد پیداواری لاگت کم کرنا اور ملکی برآمدات کو فروغ دینا ہے۔
وزیر اعظم شہباز شریف کا کہنا تھا کہ آئندہ 3 سال تک پورا سال صنعتی اور زرعی شعبے کو اضافی بجلی 22 روپے 98 پیسے فی یونٹ فراہم کی جائے گی، صنعتوں اورکسانوں کو نومبر 2025 سے اکتوبر 2028 تک رعایتی قیمت پراضافی بجلی ملے گی۔ انہوں نے کہا کہ صنعتی شعبے کو 34 روپے اور زرعی شعبے کو 38 روپے پر ملنے والے یونٹس کی قیمت کم کرکے اضافی یونٹس فراہم کیے جائیں گے جب کہ روشن معیشت بجلی پیکج کے تحت فراہم کی جانے والی بجلی کا بوجھ گھریلو صارفین اوریا کوئی دوسرا شعبہ نہیں اٹھائے گا۔
وزیراعظم شہباز شریف نے صنعتی و زرعی شعبے کے ماہرین اور کاروباری برادری کے وفد سے ملاقات کے دوران پیکیج کا اعلان کرتےہوئے بتایا کہ اس کے تحت نومبر 2025 سے اکتوبر 2028 تک صنعتوں اور کسانوں کو رعایتی نرخوں پر اضافی بجلی فراہم کی جائے گی۔
وزیراعظم شہباز شریف نے کہا کہ اللہ کے فضل و کرم اور بہتر پالیسیوں کے باعث معاشی اشاریے بہتر ہوئےہیں،تاہم پائیدار ترقی کےلیے اب بھی اجتماعی محنت کی ضرورت ہے۔
انہوں نے کہاکہ معاشی بحران سے استحکام تک کا سفر مشکل ضرور تھا لیکن اقتصادی ٹیم کی کاوشوں اور کاروباری طبقے کے تعاون سے ممکن ہوا، جس کے نتیجے میں صنعتی پہیہ رواں ہوا، برآمدات بڑھیں اور روزگار کے مواقع پیدا ہوئے۔
وزیراعظم نے بتایا کہ گزشتہ سال موسمِ سرما کے دوران دیےگئے پیکیج کے تحت صنعتی و زرعی شعبے نے 410 گیگاواٹ اضافی بجلی استعمال کی۔ ملکی معیشت کی مضبوطی، روزگار کے فروغ اور ترقی کےلیے صنعت و زراعت کا فروغ ناگزیر ہے۔
وزیراعظم شہباز شریف نے اس عزم کا اظہار کیاکہ حکومت ملکی صنعتوں اور زرعی شعبے کی خطے میں مسابقت بڑھانے اور کاروباری آسانیاں فراہم کرنے کےلیے مزید اقدامات کررہی ہے، کیوں کہ جب یہ دونوں شعبے ترقی کریں گے تو ملک قرضوں کے بوجھ سے نجات حاصل کرسکے گا۔
